O dhivehi, divehi u maldiván (dito mahl en Minicoy) ye una luenga indoaria, oficial en a Republica de Maldivas. Tiene 300.000 fabladors, a mayoría en as islas Maldivas y en a isla de Minicoy u Maliku, en l'archipelago d'as Laquedivas (India).
O divehi, de conchunta con o singalés, forman o grupo singalesomaldivián (u indoario insular) d'as luengas indoarias, o mas meridional d'ista familia. Si d'antis mas se creyeba que o divehi se yera deseparau d'o singalés, filologos como M. W. S. de Silva u S. Fritz concluyen que as dos luengas naixioron simultaniament d'un mesmo pracrito cuan colonos indoarios d'o norte d'a India s'afincoron en as islas meridionals por as envueltas d'o sieglo V aC.
Muitas luengas han influyiu en o dhivehi d'entre os sieglos, estando-ne l'arabe a prencipal. Atras son estatas l'indi, o francés, o persa, o portugués y l'anglés.
Categoría:Luengas indoiranicas Categoría:Luengas de Maldivas Categoría:Luengas d'a India