Tito Montero ye un periodista, escritor y direutor de cine asturianu.
Trayeutoria Fíu d'albañil y nietu de ferroviariu, nació y medró n'Uviéu. Estudió Comunicación Audiovisual y Publicidá y Rellaciones Públiques pola Universidá Pontificia de Salamanca y trabayó en prensa escrita, radio (RPA) y en televisión (TPA, Telecinco y TeleAsturias). Especializáu en periodismu cultural, foi creador y dirixó'l programa radiofónicu de cine La Pantalla Mecánica y dende 2015 conduz el programa cultural Pieces (Televisión del Principáu d'Asturies) sobro l'actualidá en lliteratura, música, cine, creación audiovisual, teatru, artes plástiques, cultura tradicional.
Mientres desenvuelve la so xera periodística, sigui esperimentando cola imaxe. Del microrrelatu "Los platos rotos" (2015) sobro l'abandonu y zarru de la fábrica de lloza de San Cloyo n'Asturies, premiu FICARQ (Festival de Cine y Arquiteutura 2015 nació'l so primer curtiumetraxe, El esplendor (2016) una curtia hestoria del capitalismu industrial. Siguió-y en 2017 el so primer llargumetraxe, La ciudad y los premios y un nuevu curtiu, Interrail/Mahnmal (2018) que narra'l percorríu per Europa d'un grupu d'amigues n'Interrail demientres el branu anterior a la so entrada na universidá.
En 2018 dirixó Regreso a la aldea perdida, la primer serie documental pa internet de la hestoria de la Radiotelevisión del Principáu d'Asturies. Al traviés de 14 capítulos, cola producción executiva de Ramón Lluís Bande, la serie avérase a los conceutos trataos por Armando Palacio Valdés (1853-1938) en La aldea perdida (1903) y amuesa distintes realidaes sociales y económiques de l'Asturies de la segunda década del nel añu del zarru de les mines por mandatu de la Xunión Europea por non competitives. La versión cinematográfica d'esti proyectu transmedia foi'l llargumetraxe El pasado presente, nel que narra'l procesu de la desindustrialización de les cuenques y que forma parte de la filmografía del Nuevu Cine Asturianu. «Interésame más la realidá que la ficción nesti momentu» esplica el cineasta que reivindica'l documental. Na serie inclúi tamién el rodaxe d'Elisa Cepedal.
En 2019 estrena'l documental Un fantasma recorre [...] na seición oficial de curtiumetraxes del Festival Internacional de Cine de Xixón. El curtiumetraxe reivindica la figura de Rafael del Riego, abanderáu de los lliberales asturianos, y la so llucha contra l'absolutismu. La so propuesta defínese por una gueta «d'un cine que se posicione al respeutu de la hestoria y que seya capaz de xenerar pensamientu». El curtiu compitió nel Festival de Málaga de 2020.
En 2020 estrena Los ladrillos, un viaxe familiar per Chicago nel que se produz un primer acercamientu a la figura del so güelu, desapaecíu mientres la guerra civil. "El mio pá escapó de la mina pa construyir edificios coles sos manes demientres más de mediu sieglu. Ye lo que me permite escribir, ye lo que me permite facer películes. Ye lo que me dexa tar equí y una vegada equí'l tamañu de los edificios qu'otros albañiles construyeron para los sos amos núblame la mirada. En Chicago solo soi capaz de pensar ente la distancia ente la escala humana y l'escala del poder... y esguilar lloñe del suelu" narra cola so propia voz el cineasta.
Memoria histórica miniaturadeimagen|Fotograma de la película Hilos. El 1 d'agostu de 1937 Felipe García Moro, güelu del cineasta, morrió na Batalla del Cimeru. Con Hilos (2022) Tito Montero ye la primer ocasión na que daquién grabó a la so familia recuperando la memoria de quien "hasta entós, nunca esistió". ¿Inflúi la condición de clase na memoria? ¿A qué tipu de persones puede borrase de la Hestoria? plantega'l documental qu'amuesa'l pasáu calláu de la so propia familia, premiáu na seición oficial Tierres en trance del Festival Internacional de Cine de Xixón. Nun principiu, el llargumetraxe debía llamase "Notas sobre el silencio", en referencia al silenciu tantu institucional como familiar sobro la figura del güelu.
En 2022 presenta "La estrategia del roble" un proyectu autobiográficu de testos y cantares que se convierten n'ensayos fílmicos sobro los años de guerra n'Asturies, que se completa con un llibru y una esposición.
Cine asturianu El cine asturianu ye una constante na reflexón del cineasta que desenvuelve una investigación pa la so tesis doctoral na Universidá d'Uviéu sobro "La construcción del cine asturiano a comienzos del siglo XXI".
En 2023 Hilos de Tito Montero y Contracampos de Ramón Lluís Bande proyeutáronse en Xixón nuna xornada especial dedicada al cine d'autor asturianu y fueron proyeutaos en distintos conceyos d'Asturies nun proyectu de la Cinemateca ambulante.
La esistencia del cine asturianu y les sos claves son el focu del trabayu de 2024 presentáu nel documental Cuartu 207 (2025). Tito Montero recupera'l proyeutu aniciáu en 2018 por Ramón Lluís Bande Hotel Asturies (2019) cola mesma propuesta: doce cineastes asturianos con película nel Festival Internacional de Cine de Xixón pasen pol cuartu 207 del Hotel Asturies de Xixón para cavilgar sobro'l cine asturianu. Participen nel documental Pablo Casanueva, Maryam Harandi, Diego Flórez, Omar Tuero, Ana G. Argüelles, Álex Galán, Howi Álvarez, Antonio Llaneza, Alicia Moncholí, Manuel García Postigo, Sergio Montero y Ramón Lluís Bande.
Obra La filmografía de Tito Montero ye considerada dende los sos primeros trabayos como la de «un autor que decidió posicionase con plena conciencia y discursu como re-llector políticu y social de la nuesa llinea histórica», como señala l'escritor Alejandro Fernández-Osorio nuna crítica sobro Un fantasma recorre […] (2019)
Los analises de la propuesta cinematográfica de Montero, planos y montaxe, el so cine-ensayu encamiéntennos a confrontar múltiples escosamientos: dende la desllocalización d'empreses y el final de la industria minero hasta la espectacularización de la imaxe o la mesma ruina del llazu simbólicu ente seres humanos.
Siguiendo les enseñances de Dziga Vertov, Montero dedícase a construyir una forma particular de montaxe asociada a la so esperiencia con un entornu convulsionáu. Como un nuevu home de la cámara afita la mirada nuna tierra en desapaición inxertada nun mundu en tresformación acelerada y apuesta por un montaxe continuu de documentos históricos, que constitúin un marcu visual capaz de producir llectures múltiples sobre esti territoriu y esti tiempu. Como los de Vertov, los documentos colos que trabaya Montero son, d'una banda, ruines de la modernidá; y d'otra, materiales ensin terminar, incompletos ya informes que quiciabes tovía quieran falanos d'un porvenir señala'l tamién cineasta y escritor Ramón Lluís Bande nel testu: "Nel llaboratoriu creativu de Tito Montero: 11 notes de llectura de ‘La estratexa del roble'":
Filmografía
Los platos rotos (2015) microrrelatu 2' El esplendor (2016), curtiumetraxe 6' 10 La ciudad y los premios, (2017), llargumetraxe interrail / mahnmal (2018), curtiumetraxe 7,15' Regreso a la aldea perdida (2018), serie web+tv El pasado presente (2018) llargumetraxe Un fantasma recorre […] (2019) curtiumetraxe Los lladrillos (2020) curtiumetraxe La estrategia del roble (2022) expo_web Hilos (2022) llargumetraxe cuartu 207 (2025) Áramo (2026) en producción
Publicaciones
10 Corsarios (2012) novela Ed Bestia Audax Charlize Theron y las democracias ardientes (2013) relatos Ed Bestia Audax. Fotografías de Marcos Vega y García de Marina. La estrategia del roble (2020) ensayu editáu pol Festival Internacional de Cine de Xixón
Ciudadano Riego. El asturiano que no quiso ser Napoleón. Cuaderno de apuntes para un[a película] collage. (2026) Ilustraciones: Marina Munárriz Álvarez. Bestia Audax Colección aramo ISBN: 978 84 09 82470 0
Premios y reconocencies
Duets-El precio de la fama (2010) foi escoyíu a competición pol Festival Internacional de Cine de Xixón y ganó el Premiu del Públicu nel IV Festival Bocanegra. Premiu FICARQ (Festival de Cine y Arquitectura 2015 por "Los platos rotos" Un fantasma recorre [...] (2019) foi estrenáu nel FICX 2019 y escoyíu na Sección oficial de Curtios Documentales del Festival de Málaga 2020 El curtiumetraxe Los ladrillos (2020) foi escoyíu para participar nel Festival Internacional de Curtiumetraxes de Vila do Conde de Portugal. Hilos (2022) Premio Dama al meyor guion de película española y Premiu del Públicu de la competición "Tierres en trance" a la distribución en Festival Internacional de Cine de Xixón 2022.
Bibliografía Escombros contemporáneos, estratos modernos… y secreto marxista de la “existencia” en el cine de Tito Montero por Pedro A. Aguilera Mellado
Referencies
Enllaces esternos
Categoría:Direutores de cine d'Asturies Categoría:Periodistes d'Asturies Categoría:Persones d'Uviéu