María Antonia Salomé Fernández Martínez , tamién conocida como Mariantonia Salomé, foi una pintora y escultora española.
Trayectoria Nació en La Pola L.lena, na provincia d'Asturies. Llicenciose en Belles Artes pola Escuela Superior de Belles Artes de Roma en 1960, especializándose en 1976 en museoloxía y comunicación visual na Universidá de Florencia, títulu que convalidó na Facultá de Belles Artes de la Universidá Complutense de Madrid.
Trabayó la escultura, la pintura y tamién el mosaicu. Emplegaba téuniques mistes, pulverizaciones, esmaltes, pintura al oliu y, principalmente, colores fríos. Empezó la so trayectoria artística nos años 60 cola pintura figurativa anque non nuna forma convencional. Na década de los 70, mientres viaxaba por dellos llugares d'Italia, Francia, América y Xapón, Salomé esperimentó con otros materiales, tresformando la so pintura escontra daqué más informal y ricu n'afayos espresivos, lo que desaguó nuna pintura geometrizante, o como ella mesma definía, "estructuración múltiple del espaciu", que buscaba espresar el mundu de les galaxes y l'universu.
La obra de Salomé estuvo en múltiples ciudaes europees, como Roma, París, Nimes, Madrid, Llión, Xixón o Uviéu. Amás, atópase incluyida en diverses colecciones d'Italia, Francia, Xapón, Estaos Xuníos, Canadá o Brasil. En 1986, Salomé presentó la esposición Obra escoyida 1960-1985 na antigua Caxa d'Aforros d'Asturies que realizaba un percorríu representativu de la so trayectoria hasta la fecha, dende pintures a partir de llurdios difuminadas a pieces escultóriques inspiraes n'oxetos del día ente día. En 1980, participó na II Bienal d'Arte Ciudá d'Uviéu al pie de otres artistes asturianes, como la pintora Consuelo Vallina y l'escultora Ángela García Cuetos.
Collaboró nel grupu artísticu Ástur-71, impulsáu polos escultores Fernando Alba, Mariano Navascués y Manuel Arenas y el pintor Alejandro Mieres. Tamién formó parte del grupu xuvenil La Strada, al pie de otros artistes como Mercedes Gómez Morán, Adolfo Bartolomé García, Jesús Díaz, Zuco o Eduardo Úrculo.
Finó en La Pola L.lena el 8 de mayu de 2008.
Reconocencies A lo llargo de la so carrera, recibió dellos diplomes y nomamientos d'honor de delles ciudaes italianes, ente los que s'atopen el Premiu Vía Margutta que recibió en Roma en 1959 o la medaya de plata Ciudá de Roma que llogró un añu más tarde. En 1965, Salomé recibió per parte del Conceyu de París el Premiu del "Conseyu Xeneral del Sena". Ese mesmu añu foi escoyida Asturiana del añu en pintura pol periódicu asturianu La Nueva España.
En 2017, Salomé recibió una subvención de la Unesco para realizar llabores de restauración de teles, paneles y frescos afectaos polos hinchentes de Florencia.
Referencies
Categoría:Artistes d'España Categoría:Pintores d'Asturies