Acracio Bartolomé Díaz foi un intelectual y destacáu militante anarquista.
Acracio medró nun ambiente anarquista yá que so padre y so madre compartíen esta ideoloxía llibertaria. La so formación foi fundamentalmente autodidacta compatibilizando la llectura d'autories teóricos del anarquismu y de los clásicos de la lliteratura social y autores españoles, complementando esta formación cola aportada polos sos compañeros de la fábrica de vidrios La Industria, onde entamaría a trabayar con once años y na escuela del maestru anarquista xixonés Eleuterio Quintanilla.
Incorporaríase a la CNT y yá nel añu 1923, depués del trunfu de la dictadura de Primo de Rivera yá yera unu de los militantes más señalaos de la organización, entrando, arriendes d'esto, a formar parte de la Federación Anarquista Ibérica, FAI, por más que marcaría distancies coles aiciones violentes que llevaba a cabu la citada Federación.
Lo mesmo qu'otros trentistes, Acracio nun creía na revolución entamada por un grupu minoritariu sinón de l'aición de les mases.
Tamién llegó a dirixir el periódicu Solidaridad, de la Confederación Rexonal d'Asturies, Lleón y Palencia. Como otros militantes del anarquismu asturianu sufriría persecución pasando periodos encarceláu y exiliándose en Francia al finalizar la Guerra Civil Española dende onde continuó cola so actividá militante y onde morrería depués d'una llarga enfermedá.
Referencies
Enllaces esternos
El cielu por asaltu
Categoría:Persones de Xixón Categoría:Anarquistes d'Asturies Categoría:Movimientu obreru