Total War: Warhammer é un videoxogo de estratexia por quendas e en tempo real desenvolvido por Creative Assembly e publicado por Sega. O xogo baséase na mecánica de xogo da serie Total War con faccións da serie de xogos Warhammer de Games Workshop. É o décimo título dentro da serie de videoxogos Total War. Ó contrario que os seus predecesores, que inclúen ambientacións históricas, o xogo introduce unha ambientación de fantasía así como personaxes do universo Warhammer.
Mecánica de xogo Cada facción ten acceso a unidades e elementos de campaña únicos. Un novo modo de misións e batallas dirixe ó xogador cara completar diversas misións e batallas para recibir varios obxectos e habilidades novas. Criaturas voadoras, como os dragóns, tamén aparecen no xogo. O mapa da campaña é semellante ó de Total War: Attila, coa excepción de que presenta unha diversidade maior no terreo físico e no clima segundo o punto do mapa. A maxia tamén forma parte dos elementos introducidos nesta edición. Ó contrario ca outros xogos da serie Total War, os axentes inclúense nas batallas así coma no mapa de campaña. Total War: Warhammer inclúe unha maior candidade e variedade de animacións que os xogos anteriores da serie, e mantén características destes como a construción de edificios e cidades, a diplomacia e o recrutamento de unidades.
Desenvolvemento O 6 de decembro de 2012, Sega anunciou a súa colaboración con Games Workshop para desenvolver varios títulos para a serie Warhammer. Sega encargoulle o estudio The Creative Assembly, creador da serie Total War, que desenvolvese estes xogos. O primeiro deles programouse para a súa publicación máis tarde do 2013. No momento dese anuncio, The Creative Assembly tiña cinco títulos en desenvolvemento, incluíndo Total War: Rome II e Alien: Isolation. O 13 de xaneiro de 2015 o xogo foi filtrado por medio dun libro de ilustracións titulado The Art of Total War. O xogo foi avanzado de novo nun vídeo publicado por The Creative Assembly en marzo dese ano como celebración do seu 15º aniversario. Porén, o xogo non se anunciou de forma oficial ata o 22 de abril de 2015, cando Sega publicou un avance cinemático de estrea para o xogo.
Recepción
A data de publicación final foi o 24 de maio de 2016. Trala súa publicación o xogo acadou unha puntuación do 86% no agregador Metacritic. IGN deulle unha puntuación de 8,6 sobre 10, GameSpot deulle unha puntuación de 9 sobre 10, e PC Gamer outorgoulle unha puntuación do 86%.
Notas
Véxase tamén Ligazóns externas
Categoría:Videoxogos de 2016 Categoría:Videoxogos dun xogador e multixogador Categoría:Videoxogos de Sega Categoría:Videoxogos de The Creative Assembly Categoría:Videoxogos de Windows Categoría:Videoxogos de OS X Categoría:Videoxogos de Linux