Tulsi Gabbard, nada en Leloaloa, na Samoa Americana, o 12 de abril de 1981, é unha política estadounidense que exerce como congresita polo 2º distrito congresual de Hawai desde 2013.
Traxectoria Gabbard é membro do Partido Demócrata e foi vicepresidenta do Comité Nacional Demócrata até o 28 de febreiro de 2016, cando dimitiu para apoiar o senador Bernie Sanders nas primarias presidenciais demócratas de 2016. Elixida en 2012, é a primeira congresista nada en Samoa e a primeira hindú no Congreso dos Estados Unidos.
Tulsi Gabbard serviu como médico de campaña na Garda Nacional do Exército de Hawai nunha zona de combate en Iraq de 2004 a 2005 e posteriormente foi despregada en Kuwait. Anteriormente, servira como membro da Cámara de Representantes de Hawai de 2002 a 2004. Cando foi elixida para a Cámara de Representantes hawaiana aos 21 anos, foi a muller máis nova xamais elixida para unha lexislatura estatal dos Estados Unidos. Apoia o dereito ao aborto, Medicare for All, oponse á alianza transpacífica do TPP, quere restaurar a Lei Glass-Steagall, e cambiou a súa postura para apoiar o matrimonio entre persoas do mesmo sexo en 2012. Gabbard manifestouse crítica con certos aspectos da política exterior estadounidense en Iraq, Libia e Siria. Opúxose ao derrocamento do presidente sirio Bashar al-Assad.
Tulsi Gabbard anunciou o 11 de xaneiro de 2018 a súa intención de concorrer como candidata nas primarias do Partido Demócrata para as eleccións presidenciais dos Estados Unidos de 2020. Lanzou oficialmente a súa campaña en febreiro de 2019, pero un ano despois, o 19 de marzo de 2020, suspendeu a súa candidatura e apoiou a Joe Biden, finalmente gañador desas primarias.
En outubro de 2019, Hillary Clinton suxeriu que Tulsi Gabbard estaba a ser utilizada como “peón” por Rusia e insinuou que a candidata ecoloxista Jill Stein tamén tiña vínculos cos intereses do Kremlim de Moscova. Estas declaracións foron interpretadas como unha acusación e provocaron unha resposta contundente por parte de Gabbard, que lle chamou en Twitter “a raíña dos belicistas… a personificación da podremia que enfermou ao Partido Demócrata” e presentou unha demanda por difamación, aínda que a abandonou en maio de 2020.
Notas
Véxase tamén
Kamala Harris
Categoría:Nados en 1981 Categoría:Política dos Estados Unidos de América Categoría:Políticos dos Estados Unidos de América Categoría:Médicos dos Estados Unidos de América