Saxifraga presolanensis l'è 'na spéce de piànta erbàcea perène che fà part de la famìa botànica de le Saxifragaceae.
Descrisiù Fùrma Biològica: Ch pulv - Camèfite pülvinàde. Piànte che g'ha böcc che pàsa l'envéren postàde a mìa de piö de 20 ghèi del teré e che g'ha portamènt a cüsì.
L'è 'na piànta erbàcea perène che fùrma dei cüsinècc mulzì, de fùrma emisférica e es•ciùs a tocài.
I gambì, lignificàcc en fónt, sitìi e erbàcei 'n sìma, cuarciàcc zó de fòie picinìne e peluzète, bèle spèse. Alcc 6÷12 ghèi.
Le fòie i è oblanceolàde-lineàr, spatolàte, lónghe dei 7 ai 10 mm e lòrghe 2÷5 mm, cuarciàde zó de pelacì ghiandulùs, le fòie dei agn prìma le rèsta e le ciàpa culùr gris arzentàt.
Le 'nfiurescènse i è, ladìne, con póch fiùr (2÷4) bèi rar.
Habitat Préde e canalù, sfrizidüre de le préde, gròte deèrte e ripàr, a cundisiù de éser a l'ómbra e schiàt de le 'ntempérie, sö fónt calcàreo; 1.700÷2.400 m s.l.m.
Distribusiù e conservasiù Endemismo rar e esclüzìf, la crès endèn teretóre che 'l va de la Al Brembana (pruvìncia de Bèrghem) a la Al Camònega (pruvìncia de Brèsa), a pasà per la Prezolàna, per i mucc de l'Arera, Pizz Camin, Pilù de Montefiore, Sasna e Bagòsa.
L'è spéce prutigìda per lége a leèl nasiunàl.
Bibliografìa ENGLER, A. & E. IRMSCHER. 1912. Saxifragaceae, Saxifraga. Das Pflanzereich, Lìpsia, IV, 117: 302 PIGNATTI S., Flora d'Italia, 3 voll. Edagricole, Bologna 1982 CONTI F., ABBATE G. ALESSANDRINI A. BLASI G., An Annotated Checklist of the Italian Vascular Flora, Roma, Palombi editori, 2005 TAGLIAFERRI F., BENDOTTI M., BONA E., 2009. La Valle di Scalve - Guida alla flora rilevante degli ambienti naturali.
Categoria:SaxifragaceaeCategoria:Botànica