San Pàol (Italià: San Paolo) l'è 'n cümü de de la Pruvìncia de Brèsa. El se tróa 'ndèla Bàsa Bresàna Ucidentàl a 26 km de la cità de Brèsa en diresiù sudòvest.
El cümü el g'ha ciapàt el nòm de San Pàol en unùr del Pàpa Pàol VI per mès del decréto del presidènt de la Repüblica del més de Óst del 1964. Prìm de alùra 'l se ciamàa Pedergnàga-Orià, del nòm de dò de le frasiù che adès le fùrma 'l paés, ensèma a Scarpisöl e Cremezà.
Pedergnàga 'l par véser stàt en abitàt de urìgin romàna. En quac repèrt archeològic retroàt en Pedergnàga l'è al dé d'encö conservàt endèl muzèo del Tempio Capitolino a Brèsa. Dègna de 'na mensiù l'è 'na làpide troàda 'ndèl 1824 de le bànde del castèl e de la céza de Pedergnàga endóche se lümìna el nòm de Farraticanus, riferìt al fàto che töta la zòna l'ìa ciamàda Pagus Farraticanus, cioè paés del far, che l'è 'n cereàl che 'n época romàna l'ìa dopràt e cunusìt en bèl tòc de piö de adès. A San Pàol, per celebrà chèsta caraterìstica del paés, ògna an se fà la Fèsta del Far.
Apò a Orià e Cremezà i fàa part del Pagus Farraticanus. El nòm de Orià el sömèa vègner de Aurelianum, cioè riferìt al nòm latì Aurelius; chèl de Cremezà 'l sömèa ligàt al nòm latì Cremutius e de conseguènsa a 'n Fundus Cremutianus. Orià, endèl alt médio évo, l'ìa séde de 'na piéf gh'ìa a le sò dependènse apò a le comunità de Farfènc, Motèla, Gabià (chèste trè 'ncö i è part del teretóre del cümü de Bórc San Giàcom), Pedergnàga, Scarpisöl, Cremezà e Trignà.
Evulusiù demogràfica
Riferimèncc
Categoria:Bassa bressana