El Pinetto Fumagalli (Briosch, 1888 - Comm, 1963) l'è staa on poeta lombard. Nassuu in Brianza, l'è andaa a viv a Comm in del 1900, e l'è restaa lì fina a la mort. L'ha scrivuu on liber de poesii in lombard, ciamaa I do facc. Ona poesia QUAND SON RIVAA LA PRIMA VOLTA A COMM
È passa cinquant'ann, ma ghe l'hoo in ment, come se 'l fuss staa ier, quand sont rivaa a Comm la prima volta, tutt content de vegnì a fà scoeul tecnich in cittaa.
Vun d'i primm dì d'ottober; quasi nott; terra e ciel scur compagn; milion de stell... mì sont al finestrin, quand, tutt a'n bott, el treno, svoltand scià dal Baradell,
el me destend denanz on tâl scenâri che me fà restà lì come de sass! I stell, che prima éren domà per ari, adess gh'hinn a centenn anca giò a bass...
Ghe n'è poeu, in fila, tucc distant l'istess vunna da l'altra, giust on sett o vott che paren là per taccà insemm de sbiess el ciel de sôra cont el ciel de sott.
Stell depertutt: intorna, sott e sôra:... me batt el coeur, capissi pù nïent; gh'hoo comè l'impression che 'l treno el côra a precipizzi in mezz al firmament...
Soo no se sont in sogn o dessedaa... ma propi in quella senti 'l mè fradell che 'l fà: "Pinetto, giò che semm rivaa!". E, inlocchii, ciappi sù 'l mè fagotell.
Bibliografia AA.VV., Antologia della poesia nelle lingue e nei dialetti lombardi dal Medioevo al XX secolo, Milan, Libri Schweiller, 2006.
Categoria:Autor in lombard