L'Imperi todesch (in todesch: Deutsches Reich), ciamaa anca Segond Reich, l'è staa on statt de l'Europa central, che l'è duraa del 18 de genar del 1871 al 9 de november del 1918. A l'era el resultaa de l'unificazzion de la Germania (olter nomm per ciamà el paes): a partì de la segonda metà del Vottcent, gh'era staa on process progressiv de unificazzion di vari statt todesch sotta la guida del Regn de Prussia, governaa de la fameja di Hohenzollern. El process el gh'ha 'vuu on pont de svolta despoeu de la guerra contra l'Austria (1866) e, soratutt, quella contra la Francia (1870): a la fin de 'sta guerra, l'è staa proclamaa el noeuv imperi todesch. In di desenni dopo, la Germania imperial, sotta la guida del canzellee Otto von Bismarck, l'ha pontaa a deventà la potenza principal del continent: prima, al temp del Bismarck, 'me garanzia de l'orden politegh de tutt l'Europa, poeu 'me statt con l'egemonia militar e industrial. Borlada denter i contrast in tra i vari potenz europei, la Germania l'ha contribuii a slargà el teater de la Prima Guerra Mondial (scominciada de la guerra in tra l'Austria, soa leada, e la Russia): a la fin de la guerra, battuda in sul camp, la gh'ha 'vuu de arendes, e inscì l'è finii l'imperi. Lista di imperador Ghielm I de Hohenzollern (1871-1888) Federigh III de Hohenzollern (1888) Ghielm II de Hohenzollern (1888-1918) *