La Linia M4 l'è la quinta linia de la metropolitana de Milan che la corr de l'est a l'ovest de la cità, a tacà insema San Cristofen FS al Reoport de Linaa, che per la pupart l'è in territori de Segraa, ma a nivell de tarifa l'è considerad Milan. El color identificativ de la linia l'è el bloeu.
A dispet del numer l'è la quinta linia, perchè anca se la gh'haveva de dervì per l'EXPO gh'è volsud pussee de temp e per la vertura total gh'è stad de spetà el 12 de otover 2024: el prim ram, de Datee a Linaa, l'è vert el 26 de november del 2022 e de Datee a San Babila el 4 luj 2023, roba che finalment la taca al rest de la linia metropolitana. In del vesser minga conligada con la linia 5 l'è la prima metropolitana de la cità che, a la vertura, la incrosa minga tucc i alter linie.
La linia la incrosa el servizzi ferroviari suburban a Datee, Forlanini e al capolinia de San Cristofen, la M1 a San Babila e la M2 a Sant Ambroeus, anca se fina adess gh'è de passà foeura del mezanin per el scambi. El conligament con la linia M3 a l'è in tra la fermada de Sforza Policlinich e Missori e l'è fad in superfiss: in principi gh'heva de vességh un sota-pass pedonal, ma l'è stad minga fad.
Ligam de foeura Sit ofizzial
Alter proget