L'Albert de Gandin (Crema, agn 1240 - Genoa, 1310 o 1311) a l'è staa on giurista e giudes lombard, che 'l s'è ocupaa de dirizz penal de statutt.
Biografia Nassuu a Crema in di agn 1240, el gh'ha avuu in tra i sò maester l'Albert Galeott e 'l s'è laureaa a Bologna senza andà innanz in la carriera accademica ma l'ha taccaa a fà el giudes, lavorà che l'ha faa del 1281, l'ha scominciaa a Lucca, al 1310 in vari città de la Lombardia storega, indova che despess l'è anca scernuu 'me assistent di podestà e infinna podestà degià che l'era l'epoca indova che 'l se preferiva assegnà el compet a 'n terz forestee: l'è staa in del 1284 assessor del podestà de Bologna Giovann Palastrell de Piasenza prima e del Tebald Brusaa de Bressa dopo.
L'è staa assessor del podestà de Perugia Peder Confalonee de Bressa del 1286 al 1287 e poeu a Fiorenza del 1288 al 1289 con l'Antoni Fissiraga de Lod.
A bon cunt però la pupart de la soa carriera de giurista l'è stada a Bologna, indova che l'era giudes e l'ha lavoraa in d'on period assee de rebelott indova che gh'è staa on mugg de mazzament politegh, a la fin l'è staa slontanaa de la città e in del 1299 l'è trovaa a Siena, a juttà el podestà Totelmann di Totelmann de Bergom.
El fa el salt de carriera a Fermo, indova che l'è podestà del 12 de magg al 12 de luj del 1305, e 'l gh'ha dopo di alter offizi important finna a la soa mort, capitada in del 1310 o 1311.
L'ha scrivuu on poo de liber de dirizz, vun, el De maleficiis, indova che 'l parla del riatt e del dirizz in azion in la giustizia del liber comun e l'alter, Quaestiones statutorum, in su la soa esperienza cont el dirizz comunal, assee compagn in di città ma different de quell roman.
In la coltura L'è staa a longh ciappaa per cremones, tant che el Diplovatazio el definiva "natione Lombardus, patria Cremonensis", ma el s'è descovert poeu che in realtà l'è cremasch: l'error el deriva probabilment de 'n edizion di De maleficiis che 'l reportava la città fallada.
Oeuver
Quaestiones statutorum Libellus super maleficiis et causis criminalibus et statutis loquentibus de maleficiis et questionibus dependentibus a statutis
Manoscritt
Riferiment Enciclopedia Treccani
Categoria:Politegh lombard Categoria:Giurista lombard Categoria:Nassud in del XIII secol Categoria:Mort in del XIV secol