El Gonfalon d'onor de l'Ospedal Magior de Milan a l'è el drapon che 'l representa l'antigh ospedal ambrosian e l'è in mostra in del palazz di Ofizzi de la Cà Granda, inanz al musee de la Cà Granda: l'è stad progetad del Giò Ponti.
Storia L'ideja de dàgh un gonfalon a l'ospedal l'è del temp di fassista: del 1927 el president del Consili di Istitut Ospedaler, el Luigi Lanfranconi, ghe insubiss a la Cà Granda de dàss un stema de registrà a la Consulta Araldega e de fà un'insegna de mostrà in di event publegh e ai obet di benefator e l'è fada su una comission con dent el Giuseppe Bagatti Valsecchi, el Gaetano Moretti e 'l Pio Pecchiai.
El proget a l'è ciapad in man ancamò del 1930 del sucessor del Lanfranconi, el Massimo Della Porta, e se serniss de fà un vera e propi gonfalon, ispirad a quell de Milan, de spartì in d'una insegna granda per i celebrazzion e vuna picinina per i obet: a l'è tirad a man l'archivista Giacomo Bascapè per i ricerche araldeghe necessarie in di archivi istituzzionai.
Come tema a l'era stad sernid quell de la Nonziada, che l'è dedicad l'ospedal, e de la Colomba, simbol de l'istituzzion, che la saria stada atornada de alter stema: per quell minor gh'è dad l'incaregh al Ponti del 1932, e l'ann adree el parlarà bell content, in di so letere, del proget: la tessidura l'è fada de l'azienda Bertarelli, menter i part metalleghe de l'oreves Ravasco. El prim sbozzet del Ponti gh'era piasud no a la Curia, che l'ha domandad un cambi perchè l'Angiol ghe faseva nissuna riverenza a la Madona.
Dopo una sotascrizzion publega per quatànn el cost, che l'era bell grand, a l'è inaugurad el 24 de marz del 1935 in d'una fonzion solenn del cardinal Schuster in del Dom de Milan: a bon cunt però a l'era minga pront, e 'l torna in laboratori subit dopo insì de fornìll.
Riferiment
Categoria:Bandere