El termen Grecia Antiga el se referiss a la civiltaa nassuda in Grecia intorna al segond milleni prima de Crist. Originada de popolazzion de lengua indeuropea, la s'è organizada in citaa-stat (tra i pussee famose: Atenn, Sparta, Teba) che hann scomenzad on'opera de colonizazzion che l'ha tocad l'Asia Minor (incoeu Turchia) e i rive del Mar Negher, i isole del Mar Egee, l'Italia del Sud e 'l Mediterrani ocidental, vegnend a contat cont i olter popoi de quei region. Dopo che l'ha resistid ai invasion persiane al principi del V secol prima de Crist, la civiltaa grega l'è stada bona de meter in pee ona socetaa sofistegada del pont de vista politegh e coltural, e che l'è vun di pilaster de l'identitaa europea anca al dì d'incoeu. Cont el trionf de Lissander el Grand, la s'è spantegada anca in la pupart de l'Asia centrala e in de l'Egit Antigh: la soa lengua l'è deventada vun di mezi de comunicazzion pussee important de l'antighitaa e on veicol important de ideje e cognossenze. L'importanza de la civiltaa grega l'è durada anca dopo de la conquista romana de la Grecia, e anzi l'ha condizzionad anca i costum, la religion e la coltura de Roma. El tramont de la civiltaa grega el corispond pu o manch a la fin de l'etaa antiga, intorna al secol VI. La Grecia Antiga la n'ha lassad on patrimoni important in tanti camp de la cognossenza: la matematega (per esempi la filosofia), la filosofia (soratut Platon e Aristotel), l'architetura, l'art, el teater, la musega, la leteradura. L'alfabet gregh a l'è a la bas de quell latin e de quell zirillegh, e donca de quell de la pupart di lengue scrivude in del mond (anca el lombard). Varda anca Storia de la Grecia Antiga Micenee Civiltaa elenistega Lengua grega antiga Art grega Leteradura grega Architetura grega Filosofia grega Religion grega Magna Grecia Sparta Atenn