Куќа на восокот (филм од 2005)

Куќа на восокот () — американско-австралиски филм на ужасите во жанрот слешер од 2005 г., режиран од Жауме Колет-Сера. Филмот е заснован на краткиот расказ „Работа со восок“ од Чарлс С. Белден и е независна преработка на истоимениот филм од 1953 г. и „Мистеријата на музејот на восочни фигури“ (1933).

Содржина 1974 г. Жена топи восок и го истура во калап за маска. До неа седи момче и јаде житарки. Се појавува таткото на семејството, кој носи второ момче и ѝ вели на сопругата да му помогне да го смири. Го ставаат на стол и го врзуваат за него, но тој се ослободува од столот, а мајката го удира по лицето затоа што ѝ ја одрал кожата на раката.

2005 г. (денес). Четири момчиња (Ник, Вејд, Далтон и Блејк) и две девојки (Карли и Пејџ) одат на натпреварот на годината по американски фудбал. По пат, застануваат за да преноќат. Додека седат покрај огнот, доаѓа камионетка и им свети со фаровите право во очите. Ник фрла шише кон камионетката и го крши фарот, по што камионетката заминува. Ноќе, Карли, сестрата на Ник, слуша како некој шета околу шаторот, а наутро Далтон ги прашува сите каде му е камерата. Ужасна смрдеа се шири низ шумата, а Карли и Пејџ одат да видат од каде доаѓа. Следејќи го мирисот, Карли се лизга од карпата и паѓа во дупка со трупови на животни.

Пристигнува друга камионетка. Нејзиниот возач е тој што ги носи труповите тука. Карли и нејзиното момче Вејд решаваат да одат со него до најблискиот град Амброуз по каиш за автомобилот, бидејќи стариот некој го расипал. Возачот ги остава Карли и Вејд во Амброуз и заминува. Влегуваат на бензинската пумпа, но таму нема никој. Решаваат да влезат во црквата, но таму се одржува панихида, а кон нив доаѓа сопственикот на бензинската пумпа, Бо, незадоволен што ја прекинале панихидата. Решавајќи малку да прошетаат, парот влегува во куќата со восочни фигури што се наоѓа на крајот на градот. Откако ќе ги разгледаат неверојатно реалистичните фигури, забележуваат дека и самата куќа е направена од восок. Одеднаш, Карли забележува лице со маска на прозорецот. Се плашат и момчето и девојката ја напуштаат градбата.

Карли и Вејд влегуваат во продавницата кај бензинската пумпа, а таму доаѓа и Бо. Вејд не наоѓа каиш со потребната големина, па Бо ги поканува кај себе. Вејд вели дека треба да оди до тоалет, а Бо го носи во својата куќа. Карли останува во камионетката и одеднаш забележува: таа е истата камионетка што дошла ноќеска и им светела со фаровите во очите. Откако излегува од тоалетот, Вејд ги разгледува собите, а одеднаш го сечат со ножици по ногата. Вејд не успева да избега; Винсент (човекот со маската, братот на Бо) го носи во својата подземна работилница и прави восочна фигура од Вејд, давајќи му инјекција за парализа и полевајќи го жив со восок. Во меѓувреме, Карли се заклучува во камионетката и се обидува да им се јави на другите. Бо гледа дека таа се посомневала и се обидува да ја извлече од возилото. Девојката успева да го заврти клучот и да се оддалечи неколку метри, по што камионетката се заглавува бидејќи Карли не успева да управува со неа.

Карли излегува од возилото, бега во градот и влегува во црквата, надевајќи се дека ќе најде помош кај парохијаните, но забележува дека сите што се во црквата се исто така восочни фигури. Доаѓа Бо и ја фаќа. Ја врзува девојката за стоматолошка столица со каиши и леплива лента, а устата ѝ ја лепи со лепак.

Во меѓувреме, по разделбата кај дупката со трупови на животни, останатите одат во друг град (право на натпреварот), но заглавувајќи во сообраќај, се враќаат на истото место каде што преноќиле заедно. Пејџ останува со Блејк, а Ник и Далтон одат во Амброуз, каде што се договориле да се сретнат.

Таму Ник се сретнува со Бо и прашува за своите пријатели, додека Далтон оди во куќата со восочни фигури. Бо одговара дека не видел никој. Карли долу се ослободува од оковите и се обидува да го привлече вниманието на својот брат, но тој не ја слуша. Таа го протнува показалецот низ решетката за да може Ник да ја види, но тоа го забележува Бо и, додека врзува врвка на чевелот, незабележливо за Ник ѝ отсекува дел од прстот со клешти. Девојката успева да си ги раздели усните и да вресне. Ник, кој има добра физичка подготовка, со неколку удари го соборува Бо на земја, втрчува во просторијата во бензинската пумпа и се заклучува, а потоа ја ослободува својата сестра. Во меѓувреме, Далтон ја открива восочната фигура на Вејд во куќата. Тој му ја лупи кожата, мислејќи дека е восок. Во тој миг, Винсент го наоѓа и му ја отсекува главата со два вкрстени ножа. Ник и Карли не можат да заминат без пријателите и одат да ги бараат, но набргу сфаќаат дека се убиени и дека треба што побрзо да се извлечат оттаму. Винсент, пак, ги наоѓа Пејџ и Блејк во шумата и ги убива и покрај упатствата на Бо да не излегува од куќата. Во меѓувреме, Ник и Карли, криејќи се од Бо, завршуваат во кино. Откако го рануваат со самострел, бегаат во неговата куќа.

Подоцна, Винсент се враќа дома по Бо. На вториот кат од куќата, Ник наоѓа отвор преку кој тој и Карли се спуштаат долу. Братот и сестрата прво влегуваат во работилницата, каде што го наоѓаат Далтон облеан во восок, а потоа во куќата со восочни фигури, каде што се случува последната пресметка меѓу нив и браќата. Се испоставува дека Винсент под восочната маска го криел своето вистинско, изобличено лице. Карли успева да ги убие двајцата браќа, удирајќи го Бо со бејзболска палка и прободувајќи го Винсент со нож. Избувнува пожар, а восочната куќа се урива, топејќи се како свеќа; Карли и Ник во последен миг успеваат да се извлечат надвор.

Следниот ден пристигнуваат полиција, пожарникари и брза помош. Шерифот дознава дека има и трет брат, Лестер, за кој никој не знае. Кога Карли и Ник заминуваат со брза помош, на излезот од градот, Карли го гледа возачот што ја возел камионетката со животинските трупови, кој и бил третиот брат. Тој ѝ се насмевнува и ѝ мавта со раката. Брзата помош заминува од Амброуз.

Улоги

Наводи

Надворешни врски

Категорија:Американски филмови Категорија:Австралиски филмови Категорија:Филмови на англиски јазик Категорија:Американски хорор-филмови Категорија:Филмови од 2005 година

Куќа на восокот (филм од 2005)

Źródło i licencja