Ajuga laxmannii ― повеќегодишна билка од семејството усноцветни Lamiaceae. Постојат неколку теории за потеклото на името Ajuga. Според Плиниј Постариот, ова е погрешно толкување на грчкиот збор abiga, од abigere, што значи да се избрка, исфрли или отфрли. Видот се јавува во централна, јужна и источна Европа, како и во Мала Азија и Кавказ.

Опис Ajuga laxmannii е тревно растение со дрвенест разгранет ризом. Стеблата се обично неразгранети, едноставни, исправени, бројни, густо лиснати, со изразена дебелина, високи до 50 см. Целата површина на растението е влакнеста. Листовите се издолжени или овално-елиптични, освен листовите на стерилните изданоци, кои се копјести. Тие се долги од 3,5 до 5,5 см и широки од 1 до 3 см. Немаат петелки и малку го прегрнуваат стеблото со својата основа. Имаат тап врв, целиот раб, а од двете страни има прицврстени сивкасти влакна. Прицветникот е листовиден. Соцветието е очигледно класовидно, и се состои од два или три цвета во псевдо спирали. Цветовите се големи, долги од 3 до 3,5 см, имаат цветни стебла (долги 3–4 mm) и се жолти по боја, со густа мрежа од виолетови ленти. Чашката е ѕвончеста, а целата површина е влакнеста, сива по боја, со копјести или издолжени чашки заби. Забите се тапи, еднакви по должина на цевката на чашката. Венечното ливче е исто така влакнесо, со мали и копјести лобуси на горната страна, и голем и впечатлив долен дел, свиткан надолу. Прашниците и толчникот стигнуваат до врвот на страничните лобуси на долната усна. Плодот е триаголник, светло кафеав по боја, мрежесто збрчкан. Цвета од мај до јули.

Во Македонија Расте во речни клисури, во деградирани дабови шуми, брдски пасишта, камењари, на силикатна и варовничка подлога.Владо Матевски: Флора на РС Македонија, Том 2, св. 2, МАНУ, Скопје, 2021, стр. 211-212

Го има во клисурата на реката Треска, Матка, Козјак, Скопска Црна Гора, клисурата на реката Пчиња, Таорска Клисура, Куманово, Велес, Пробиштип, Неготино, Криволак, Демир Капија, Кавадарци, Прилеп, Плетвар, Козјак, Мариово, Дебар, Скопје, Водно, Чеганска Планина, Струмичко и други места.

Галерија

Наводи

Надворешни врски Список на растенија на WFO Училиште Бионет

Категорија:Флора на Македонија Категорија:Флора на Европа