Lo Partit Occitan (POC, PÒC) es un partit occitanista d'esquèrra. Foguèt fondat a Tolosa en 1987.
Originas
Lo Partit Occitan espeliguèt dins la ciutat mondina en 1987 en resulta del recampament de militants politics isolats; dels candidats que se presentèron a las eleccions regionalas de 1986 (lista "Union Occitana" dins Tarn, lista "Per las regionalas, los Regionalistas" dins Nauta Garona, etc...); e de la fusion de mantun movement occitanista (Volèm Viure Al País, País Nòstre...). Aquela union dels tres elements foguèt possibla sus la basa de la Carta del partit. Lo cap de lista a las regionalas de 1986, per la Nauta-Garona, Patric Lasseube, foguèt un dels membres fondators.
Objectius Lo Partit Occitan vòu : Enançar un movement politic occitanista credible, independent de tot autre partit e luchant per la reconeissença e l'autonomia d'Occitània. Desalienar e conscientisar lo pòble occitan. Far emergir la question occitana dins lo domeni politic.
Preséncia electorala
Desempuèi 1987, lo Partit Occitan a pas arrestat de presentar candidats a las eleccions municipalas, cantonalas, regionalas, legislativas e europèas. Baileja quauques comunas ruralas gràcias a sos cònsols e mai a d'elegits dins mantunes municipis.
Gràcias ambe las sieunas alianças ambe los Verds a qualques conselhièrs regionals. En Aquitània, Dàvid Grosclaude, en Miègjorn-Pirenèus Guilhèm Latruvèrsa, en PACA Hervé Guerrera e Anne-Marie Hautant, en Auvèrnha Gustau Aliròl.
Accion politica
Lo Partit Occitan es present en Occitània dins las luchas economicas o d'amainatjament del territòri. Sos militants intervenon dins la batèsta per l'emplec, contra la toristificacion a l'excès, contra lo nuclear, per la salvagarda del patrimòni natural... Sos militants son tanben actius dins las accions d'aparament e de promocion de la lenga et de l'identitat occitanas.
Lo PÒC fa partida del moviment per aver d'elegits occitanistas coma candidats a las municipalas de 2014, que se sona Bastir!
Aliganças politicas
Lo Partit Occitan es afiliat a la federacion "Regions e Pòbles Solidaris" que recampa divèrsas organizacions politicas dels pòbles e regions de França. Es atanben sòci d'un recampament d'organizacions nacionalistas e regionalistas de divèrses Estats d'Euròpa : l'Aligança Liura Europèa. Aqueste partit compta un certan nombre de deputats al Parlament d'Estrasborg. Lo Partit Occitan a tanben una aligança privilegiada amb lo partit ecologista francés e europèu Los Verds.
Gustau Aliròl es actualament lo pòrtaparaula del Partit Occitan e lo president de Regions e Pòbles Solidaris.
Organizacion
Los comitats locals o despartimentals son ramosats en federacions regionalas. Lo Conselh Nacional del Partit amassa los delegats representants dels comitats locals e de las federacions regionalas (es lo parlament del partit). Lo Burèu Nacional es elegit cada dos ans pel Congrès del partit (es l'executiu del partit). Lo Congrès es dubèrt a totes los sòcis del partit.
Patric Rós n'es lo president actual.
Premsa
Lo Partit Occitan possedís tanben un jornal que se ditz "Occitània - Volem Viure Al Pais". Aqueste pareis cada dos meses.
Occitània - VVAP - BP 28 - 81370 Sant Somplesi
De mai, "Lo CEBIER - la letra occitanista" pareis cada dos meses (Federacion provençau del Partit Occitan).
Région Provence / Lo CEBIER - BP 2 - 84400 Gargas Cedex
Ligams extèrnes
Site oficial del Partit Occitan Blòg del Comitat País Tolosan del Partit Occitan Blòg Seccion d'Erau del Partit Occitan Site Comitat Cantalés del Partit Occitan Blòg del Comitat d’Albigés (País de Tarn e d’Agot) del Partit Occitan Blòg Seccion Provença-Var del Partit Occitan Seccion Provença-Bocas dau Ròse/Vaucluse del Partit Occitan Blog Seccion Charanta occitana del Partit Occitan
Categoria:Movements politics Categoria:Partit politic occitan Categoria:Partit politic francés