La Marcha d'Espanha, tanben dicha Marcha ispanica, foguèt la region fortificada frontaliera entre l'Empèri Carolingian e leis estats musulmans espanhòus. Sa conquista per lei Carolingians se debanèt de 785 a 810. A partir dau sègle IX, l'afebliment de la dinastia carolingiana permetèt ai còmtes locaus, especialament a Barcelona, de venir mai e mai autonòms. Puei, en 988, lei còmtes de Barcelona refusèron de reconóisser l'autoritat dei Capecians e venguèron de fach independents.