L'A.V.I.S. a l'é l'Assossiassion dij Volontari Italian dël Sangh. A l'é stàita fondà a Milan dël 1927 për euvra d'un médich, ël dotor Vittorio Formentano. A l'é presenta a Turin dal 1929.
A l'é n'assossiassion sensa but ëd guadagn.
Ij sòcio Ij sòcio dl'A.V.I.S. a son ciamà ëd fasson popolar avisin.
Për podèj esse sòcio donator ëd l'A.V.I.S. a venta avèj fàit almanch doe donassion ëd sangh, ëd plasma o ëd piastrin-e e fé d'àutre donassion, almanch un-a minca doi agn, cand che un a l'é ciamà a fene dal përsonal ëd segretarìa. Ij donator a devo fé soe donassion a gràtis e a devo sot-ponse aj contròj sanitari ch'a-j son prescrivù dai médich.
Chi a peul nen doné, për l'età o rason ëd salute, ma a giuta l'A.V.I.S. ëd fasson continuà an travajand a gràtis, a ven sòcio apress almanch n'ann da l'inissi ëd soa atività e a lo resta fin tant ch'a fa ël travaj ch'a-j dan da fé. Costi sòcio, ansidit colaborador, a peulo esse pa pì che 'n sest dij sòcio donator.
Ij sòcio a peulo partissipé a le ciambree dl'assossiassion; ij dirigent a son sernù antra ij sòcio e a fan sò servissi a gràtis.
Le benemerense Ël regolament ëd l'A.V.I.S. a prevëd l'assignassion ëd benemerense ai sòcio donator, ch'a son consignà durant la giornà dël volontari ch'as dësrola minca ann. Coste a son: atestà apress eut donassion, atestà con mudaja ëd bronz apress sëddes donassion, atestà con mudaja d'argent apress vintequatr donassion, atestà con mudaja d'òr apress sinquanta donassion, distintiv d'òr con frasche apress ëstantesinch donassion, cros d'òr apress sent donassion.
Avis