Matemàtich. Kenneth Jon Barwise a l'era nà a Independence, ant ël Missouri, ai 29 ëd giugn dël 1942. A l'ha studià a Yale, andoa a l'é laureasse an Filosofìa e matemàtica dël 1963 e a Stanford, anté che dël 1967 a l'ha pijà ël dotorà an Matemàtica. Soa dissertassion as antitolava Infinitary logic and admissible sets, e a l'avìa Solomon Feferman tanme tuor.
Barwise a l'ha travajà an lògica matemàtica e soe aplicassion al langage e a l'anformassion. Con sò colaborador e amis John Etchemendy a l'ha dësvlupà dij métod anformàtich për lë studi dla lògica; për sòn ij doi a l'han vagnà dël 1997 la Mudaja Educom.
A l'era marià con Mary Ellen. Jon Barwise a l'é mòrt ai 5 ëd mars 2000 d'un càncher al còlon, ch'a l'avìo dëscoataje an gené 1999.
Arconossiment e ufissi Barwise a l'ha ocupà dle posission académiche a Yale (tanme professor assistent ëd matemàtica dal 1968 al 1970), Università dël Wisconsin (anté che dël 1970 a l'é dventà professor associà e a l'ha avù sò prim ëstudent ëd dotorà; a l'é peui tornaje dël 1981), Stanford e, a la fin, Indian-a. A l'ha coatà dle posission ëd visitator a UCLA, Stanford, Oxford e a la Ca dë studi avansà dle siense comportamentaj, davzin a Stanford. A l'é stàit ël prim diretor dla Ca dë studi dël langage e dl'anformassion. A l'ha avù vintun ëstudent ëd dotorà.
Dël 1992 Barwise a l'ha arseivù na làurea a onor da l'Università dla Pennsylvania e dël 1999 a l'é vnù mèmber ëd l'Academia merican-a d'art e siense.
A l'é stàit segretari ëd l'Associassion për la lògica simbòlica dal 1975 al 1978, peui mèmber dël comità esecutiv dal 1984 al 1987 e dal 1994 al 1997. Al moment ëd la mòrt a l'era vice-pressident.
A pòrto sò nòm Teorema ëd Barwise-Gandy-Moschovakis
Euvre prinsipaj Admissible sets and structures (1975) Situations and attitudes (con J. Perry, Cambridge, 1983) The situation in logic (Stanford, 1989) Hyperproof (con John Etchemendy, Stanford, 1995) Vicious circles (con L. Moss, Stanford, 1996)
Barwise, Kenneth Jon