Matemàtich e teòlogh anglèis, nassù a Londra dël 1702, mòrt a Tunbridge Wells, na sitadin-a a na sinquanten-a ëd chilòmeter a sud ëd Londra, ant ël Kent, ël 17 d'avril dël 1761. A l'era fieul d'un pastor protestant e dël 1720 a l'é vnù pastor ëdcò chiel.
Bayes a profitava ëd sò temp lìber pr'ëstudié matemàtica, dzortut sota la diression ëd de Moivre. Da viv a l'ha publicà gnun ëscrit sientìfich, ma soa competensa a l'era arconossùa, përchè dël 1742 a l'é intrà a la Sossietà Real.
Bayes a l'é dzortut anteressasse al càlcol dle probabilità. Soa contribussion prinsipal a l'é la fórmola ciamà con sò nòm, ch'a permët ëd calcolé la probabilità ëd na càusa. A l'é stàit un dij prim a anteressesse d'anferensa statìstica.
As dev ëdcò a chiel në studi dël 1736 an sla difèisa dël càlcol diferensial ëd Newton, an rispòsta a j'atach ëd George Berkeley.
Apress soa mòrt, sò amis Price a l'ha artrovà ij sò scrit an sla probabilità (dont col ch'a trata soa avosà fórmola) e a l'ha faje publiché. Tutun, antlora ij travaj ëd Bayes a son restà nen tant ëspantià e soa anfluensa a l'é restà cita an sij matemàtich ëd soa época.
A pòrto sò nòm Fórmola ëd Bayes, o fórmola dla probabilità dle càuse.
Euvre prinsipaj Divine benevolence or an attempt to prove that the principal end of the divine providence and government is the happiness of His creatures (1731). An essay towards solving a probleme in the doctrine of chances (surtì dël 1763; a conten la fórmola ëd Bayes).
Bayes, Thomas