thumb|Duch Aimon ëd Savòja, VI Duch d'Aosta. Aimon ëd Savòja, VI Duch d'Aosta, a l'é 'n mèmber dla Ca 'd Savòja e 'n diretor industrial.

A fà vàire agn ch'a travaja për la Pirelli ant ij marcà 'd Russia e ant ij pais dl'ex-URSS. Dal 2012-2013 a masenta ij marcà 'd Russia e Scandinavia. Vita A l'é 'l sol fieul mas-cc d'Amadé 'd Savòja-Aosta e 'd Clàudia d'Orléans. A l'é nà an Fiorensa dël 1967. An soa nassensa, conforma la costuma dla branca 'd Savòja-Aosta, a l'ha arseivù 'l tìtol ëd Duch ëd le Pulie. A l'é stàit batijà con d'eva 'd Giordan e 'd Piave, e a l'ha servì për sò parin ël prensi Gioann Carl ëd Borbon, peui Rèi d'Ëspagna, e 'l Rèi Costantin II ëd Grecia.

Dël 1982, quande ch'a l'era ancor an minor età, Umbert II ëd Savòja a l'ha donaje ël colar dl'Òrdo Suprem dla Santa Nonsià, e a l'é stàit ël pi giovo Sivalié ëd soa geneuira.

Apress la matura clàssica a l'é intrà ant l'Academia naval dël Colege Morosini 'd Venessia, furnì con ël gré 'd Vardia marenga. Peui, con l'angagg da ofissial d'ëstat magior, a l'ha pijà part për n'ann a d'esercitassion dla Lijansa Atlàntica ant l'océan Atlàntich e ant ël mar Mediteragn.

Abòrd ëd la fregà Maestrale a l'ha pijà part ant la Prima Guèra dël Golf. Dël 2001 a l'é andàit con sò pare al Pòl Nòrd, compìa sent agn anans da sò barba grand Luis Amadé Duch ëd j'Abruss.

Dël 2006 sò pare Amadé a l'é stàit arcognossù da la Consulta dij Senator dël Regn com ël Cò dla Ca 'd Savòja, donca sò pare a l'ha otnù 'l tìtol ëd XXVI Duch ëd Savòja, e Aimon a l'ha ardità 'l tìtol dal pare a l'é vnù VI Duch d'Aosta.

Aimon a l'ha giutà la coltura e la stòria italian-a ant ël mond, a l'ha selebrà 'l sentenari dël vòl, ël sentenari 'd Giosuè Carducci, e a l'ha reclamisà la presensa 'd na comunità italian-a an Crimèja.

A l'é parent ëd le Regie Ca 'd Grecia, Danimarca, Bulgarìa, Romanìa, Regn Unì, Spagna, Fransa e Russia. Ot l'italian chiel a prica la lenga anglèisa, fransèisa, spagnòla e russa.

Travaj A l'é dotorasse press l'Università comersial Bocconi ëd Milan, a l'é stàit amprentiss ant la banca J.P. Morgan & Co.. Apress a l'ha travajà ant ël setor marcandagi ëd Gruppo Rinascente, ëd Gruppo Merloni e 'd Fata Engineering. Dël 1994 a l'ha tramuà an Mosca, Russia, për travajé ant la Tripcovich Trading Company.

Dël 2000 Aimon a l'é intrà ant ël Gruppo Pirelli, con ël ròl ëd diretor general pr'ël marcà russi e 'd tùit ij pais ex-soviétich. Dël 2006 a l'é stàit vispressident ëd l'associassion dj'antraprèise italian-e an Russia (Gim-Unimpresa), n'agregassion dla Confindustria. Dal prim ëd Luj dël 2012 a l'é Amnistreur dla Pirelli Tyre Nordic, responsàbil për tùit ij marcà scandinàv, e dal prim dë Stèmber 2013 a l'é Amnistreur dla Pirelli Tyre për le region Russia e Scandinavia ansema. Mariage Aimon ëd Savòja-Aosta a l'é stàit ampromëttià dal Magg 2005 con Òlga 'd Grecia (Aten-e, 17 Novèmber 1971), la sconda fija dël Prensi Michel ëd Grecia da sò mariage morganàtich con Marina Karella. Amedé 'd Savòja a l'ha donà sò regi përmess al mariage.

Sò mariage civil a l'é stàit selebrà ai 16 dë Stèmber 2008 press l'Ambassada Italian-a an Mosca da l'ambassador Vittorio Claudio Surdo. Sò mariage arligios a l'é stàit selebrà ai 27 dë Stèmber 2008 an sl'ìsola greca 'd Pàtmos, ch'a l'era na part dël Dodecanèis Italiana. A-i ero la Regin-a Sofìa d'Ëspagna, ij rèi ëd Grecia Costantin II e Ana Maria (la seura dla rein-a Margrita II 'd Danimarca, e j'arpresentant dla Ca d'Orléans e dij Borbon dle Doe Sicilie. La selebrassion a l'é fasse conforma 'l tir grech-ortodòss, apress la dispensa dl'Arsvësco catòlich ëd Mosca Paolo Pezzi. Dinastìa Apress lë strument pùblich e formal ëd përtèisa dël tròno, vansà dal pare Amadé ëd Savòja-Aosta ai 7 ëd Luj dël 2006, lijà a la question dinàstica, Aimon ëd Savòja-Aosta a l'é stàit angagià për riorganisé j'òrdo dinàstich savojard (Òrdo Suprem ëd la Santa Nonsià, Òrdo dij Sant Morissi e Lasar) e dj'onor a j'òrdo gropà "con rësvard dij prim but, dij deuit dël testament ëd Rèi Umbert II e dle Lèi vigente ansima sòn". Conforma la lej republican-a italian-a j'òrdo a son pi nen arcognossù dal 1951.

Aimon, an dzorpì, a l'é delegà pressident ëd "n'arpresentansa përmanenta con ël mond ëd la conomìa e dla polìtica italian-a''".

Ai 29 dë Stèmber 2007, conforma ij deuit dël previos decrèt, Aimon ëd Savòja-Aosta a l'ha nominà na comission esecutiva për riorganisé j'òrdo dinàstich ëd la Ca 'd Savòja, con ël ròl ëd valuté ij mèirit për la rimassion ant j'òrdo 'd Sivalié dij vej sivalié e për nominé ij neuv. Aimon a l'ha ciamà che l'intrada a sia për mèirit e a gràtis, com a ciamava ch'a fùisso Rèi Umbert II, e pa con na cotiss ch'as peul paghé për intré.

Ai 32 ëd Magg 2008, apress na slonga 'd doi mèis decretà ai 32 ëd Mars, a son furnì ij travaj dla comission d'Aimon për la compilassion dle lista dij Sivalié da considré andrinta j'òrdo, conforma j'ëstatut emanà da Umbert II.

Ij sostnidor ëd lë strument d'Amadé ëd Savòja-Aosta dij 7 ëd Luj dël 2006 a arcognòsso a Aimon ij tìtoj ëd Soa Regia Autëssa ël Prensi Ardité d'Italia, Duch ëd le Pulie e Sest Duch d'Aosta, mentre për lor ch'a arnijo la validità dlë strument d'Amadé, Aimon a l'é mach Soa Regia Autëssa ëd Duch ëd le Pulie. L'Arpùblica Italian-a, nompà, a arcognòss gnun tìtol nòbil italian.

Aimon a deuvra j'arme 'd prensi ardité definìe dal Regi Decret dël prim ëd Gené dël 1890, lambel biò an slë scu 'd Savòja –cros d'argent an camp ross-. Dissendensa Dal mariage antra Aimon ëd Savòja e Òlga 'd Grecia a son nà:

-Umbert, nà ai 7 ëd Mars dël 2009. Sòj tìtoj a cambio, conforma la question dinàstica italian-a. Për j'Aostan a l'é Soa Regia Autëssa Umbert, Prensi 'd Piemont, scond an linia 'd sucession. Për j'Aostan a sarà 'l XXVII Duch ëd Savòja e ardité savojard dël Regn d'Italia. Pr'ij Vitorian a l'é stàit Soa Seren-a Autëssa Umbert, Duch ëd le Pulie e Prensi dël sangh, quart an linia 'd sucession fin-a 'l Gené 2020, e peui Soa Seren-a Autëssa Umbert, Duch ëd le Pulie, fòra dla linia 'd sucession.

La masnà a l'ha arseivù le batiaje ël 18 ëd Luj apress, da l'arvrend Lissànder ëd Borbon dle Doe Sicilie.

-Amadé, nà ai 24 ëd Magg dël 2011.

Sòj tìtoj a cambio ëdcò conforma la question dinàstica italian-a. Për j'Aostan a l'é Soa Regia Autëssa Amadé, Duch ëd j'Abruss, ters an linia 'd sucession. Pr'ij Vitorian a l'é Soa Seren-a Autëssa Amadé, Duch ëd j'Abruss, quint an linia 'd sucession fin-a 'l Gené 2020, e peui Soa Seren-a Autëssa Amadé, Duch ëd j'Abruss, fòra dla linia 'd sucession.

- Isabela, nà ai 14 dë Dzèmber 2012.

Conforma j'Aostan, che a manten-o la Lèj Sàlica për tradission dle Regie Patente, la Prinsëssa Isabela a l'é fòra dla linia 'd sucession. La supression dla Lèj Sàlica diciarà unilateralment daj Vitòrio Emanuel IV a l'é stàita combinà con un decret d'esclusion dla Ca d'Aosta da la linia 'd sucession, e donca la Prinsëssa Isabela a resta fòra dla linia 'd sucession. An tùit ij cas sòj tìtoj e soe adresse a cambio ancor conforma la question dinàstica: Për j'Aostan a l'é Soa Regia Autëssa la Prinsëssa Isabela 'd Savòja. Pr'ij Vitorian a l'é Soa Seren-a Autëssa la Prinsëssa dël sangh Isabela 'd Savòja.

Assendensa

Liniage dij pare Umbert I Biancaman, I Cont ëd Savòja 1003-1047, *~980 +1047 Odon ëd Savòja, III Cont ëd Savòja 1051-1057, *1023 +1057 Amadé II ëd Savòja, V Cont ëd Savòja 1078-1080, *1046 +1080 Umbert II ëd Savòja, VI Cont ëd Savòja 1080-1103, *1065 +1103 Amadé III ëd Savòja, VII Cont ëd Savòja 1103-1148, *1087 +1148 Umbert III ëd Savòja, VIII Cont ëd Savòja 1148-1189, *1136 +1189 Tomà I ëd Savòja, IX Cont ëd Savòja 1189-1233, *1177 +1233 Tomà II ëd Savòja, XI Cont ëd Savòja 1253-1259, *1199 +1259 Amadé V ëd Savòja, XV Cont ëd Savòja 1285-1323, *1249 +1323 Aimon ëd Savòja, XVII Cont ëd Savòja 1329-1343, *1291 +1343 Amadé VI ëd Savòja, XVIII Cont ëd Savòja 1343-1383, *1334 +1383 Amadé VII di Savoia, XIX Cont ëd Savòja 1383-1391, *1360 +1391 Amadé VIII di Savoia, XX Cont e I Duch ëd Savòja 1391-1416, I Prensi 'd Piemont *1383 +1451 (Antipapa Flis V) Lodvigh ëd Savòja, II Duch ëd Savòja 1440-1465, II Prensi 'd Piemont, *1413 +1465 Flip II ëd Savòja, VII Duch ëd Savòja 1496-1497, VII Prensi 'd Piemont, *1443 +1497 Carl II ëd Savòja, IX Duch ëd Savòja 1504-1553, IX Prensi 'd Piemont, *1486 +1553 Emanuel Flibert ëd Savòja, X Duch ëd Savòja 1553-1580, X Prensi 'd Piemont, *1528 +1580 Carl Emanuel I ëd Savòja, XI Duch ëd Savòja 1580-1630, XI Prensi 'd Piemont, *1562 +1630 Tomà Fransesch ëd Savòja, I Prensi 'd Carignan, *1596 +1656 Emanuel Flibert ëd Savòja, II Prensi 'd Carignan, *1628 +1709 Vitòrio Amadé I ëd Savòja, III Prensi 'd Carignan, *1690 +1741 Lois Vitòrio ëd Savòja, IV Prensi 'd Carignan, *1721 +1778 Vitòrio Amadé II ëd Savòja, V Prensi 'd Carignan, *1743 +1780 Carl Emanuel ëd Savòja, VI Prensi 'd Carignan, *1770 +1800 Carl Albert ëd Savòja, XXIII Rèi ëd Sardënia, XXI Prensi 'd Piemont, VII Prensi 'd Carignan *1798 +1849 Vitòrio Emanuel II ëd Savòja, I Rèi d'Italia, XXIV Rèi ëd Sardënia, XXII Prensi 'd Piemont *1820 +1878 Amadé I ëd Savòja, XXIII Rèi d'Ëspagna, I Duch d'Aosta *1845 +1890 Emanuel Flibert ëd Savòja, XXIV Prensi dj'Asturie, II Duch d'Aosta, *1869 +1931 Aimon ëd Savòja, III Duch d'Aosta, *1900 +1948 Amadé ëd Savòja, V Duch d'Aosta, XXVI Duch ëd Savòja, *1943 +2021 Aimon ëd Savòja, VI Duch d'Aosta, XXVII Duch ëd Savòja''', *1967

Categorìa:Ca ëd Savòja