Джібуті (ар. جيبوتي Jībūtī, аф. Yibuuti, сом. Jabuuti, фр. Djibouti), офіціално Република Джібуті є держава у восточнуй Африці. Граничит из Сомалійов на юго-востоці, Ефіопійов на западі, Ерітрейов на сівері тай из Аденськым заливом и Червеным морьом на востоці. На другому березі залива лежит Ємен. Почти цілоє населеня належит ид двом етнічным ґрупам, а то сут сомалійці (котрі творят булшину) и афары.
В античну добу теріторія Джібуті вєдно з Сомалійов была частьов Земли Пунт, за котру знаєме из еґіпетськых жерел. Май пак ся в сьому реґіоні находили Іфатськый (X-XV. ст.), и по ньому Адалськый султанаты (XV-XVI. ст.); оба мали столицю в Зейлі близко теперішнього Джібуті. Колонія Французька Сомалія, котра передила Джібуті, была заоснована на кунцьови XIX. столітя. Удты была прокладена желізна дорога в Адіс-Абебу, дякуючи котруй варош Джібуті умінив Зейлу як главный порт для Ефіопії. По референдумі 1977. року Джібуті ся стало независимов державов. Напятя межи афарами тай ісса (основным субетносом сомалійцюв у Джібуті) привело в 1991. році ид гражданськуй войні. Стороны заязали мирный договор в 2000. році.
Джібуті має стратеґічноє положеня межи Червеным морьом и Індійськым океаном, пиля ключовых морськых торговых путюв. Служит ги важный пункт для дозаправкы и перекладкы. На теріторії Джібуті ся находит много воєнных баз, што приносит державі коло 5% ГДП (ВВП).
Джібуті