Gisèle Pelicot ye una xerente de loxística francesa que ganó sonadía arriendes de la so denuncia pública de lo que se conoció como'l casu de les violaciones de Mazen, arrenunciando al so derechu al anonimatu como forma de concienciación sobro los abusos sexuales y de los peligros de la sumisión química. Por ello, en 2024 foi citada como una de les «25 muyeres más influyentes de 2024» pol Financial Times y la BBC incluyó a Pelicot na so llista de les 100 muyeres más influyentes del añu.
Biografía Nació'l 7 d'avientu de 1952 en Villingen-Schwenningen, nel suroeste d'Alemaña, y el so pá yera un militar francés. Llegó a Francia cuando con cinco años y perdió a la so madre por cáncer a los nueve. En 1971 conoció al so futuru home, Dominique Pelicot. Casó n'abril de 1973 y treslladáronse a Villiers-sur-Marne, na periferia de París, onde criaron a los sos trés fíos, dos varones y una muyer.
Dempués de pasar dellos años criando a la so familia, Pelicot empezó a trabayar na empresa eléctrica francesa Électricité de France nel área de París, onde tamién trabayaba'l so home. Permaneció ellí mientres el restu de la so vida llaboral y finalmente consiguió un puestu de xestión en loxística para centrales nucleares. En 2013, dambos xubiláronse y colaron a Mazen, nel sureste de Francia. Vivíen nuna casa grande con piscina y frecuentemente pasaben ellí los branos colos sos fíos y nietos. Gisèle Pelicot consideróla una vida feliz dafechu. Divorciáronse llegalmente en 2024, tres 50 años de matrimoniu.
Violaciones y xuiciu De xunetu de 2011 a ochobre de 2020, primero en París y depués en Mazen, el so home Dominique Pelicot captó al traviés d'internet a decenes d'homes por qu'abusaren sexualmente de la so muyer, Gisèle Pelicot, mientres ésta taba inconsciente por efectu de les drogues que-y daba él. Hasta 72 homes violaron a Gisèle Pelicot mientres el so home grababa les agresiones, de les que la policía francesa atopó más de 20.000 fotografíes y videos. Estos fechos fueron reconocíos por Dominique Pelicot nel segundu día del xuiciu.
El 4 de setiembre de 2024, empezó'l xuiciu y decidió arrenunciar al so derechu al anonimatu y solicitó que'l procesu fuera públicu, asina como la proyección de los videos de les sos violaciones, pa que la «vergüenza» cayera sobre'l llau de los acusaos. Tamién decidió siguir con esta postura en sofitu al restu de víctimes d'abusos, en recibiendo cartes de munches d'elles y de sentir el sofitu de la sociedá civil.
Reconocencies La determinación de Gisèle Pelicot mientres el procesu xudicial poles sos violaciones valió-y l'aclamación internacional, convirtiéndose nun símbolu de la llucha feminista, aportando a inspiración para la creación obres d'arte nel so honor, como les qu'apaecieron en forma de grafitis o colaxs en distintes ciudaes de Francia.
N'avientu de 2024, foi nomada pola BBC como una de les 100 muyeres más influyentes del añu, xunto a otres como la Premiu Nobel y tamién superviviente de violaciones masives, Nadia Murad. Ese mesmu mes, la revista del Financial Times, FT Weekend, publicó la so llista de les 25 muyeres más influyentes del mundu, ente les qu'incluyó a Pelicot. Amás, Ana Redondo García, ministra española d'Igualdá, anunció la creación d'un nuevu centru d'acoyida n'Asturies pa muyeres víctimes de violencia de xéneru, que llevaría'l nome de Pelicot.
Tres el veredictu, los sos siguidores estimaron a Gisèle la so valentía y celebraron la sentencia dictada al so ex-maríu. El presidente francés, Emmanuel Macron, agradeció la so «dignidá y valentía».
Referencies
Enllaces esternos
Categoría:100 Muyeres BBC Categoría:Persones de Villingen