El Circuitu de Madring (estilizáu como MADRING) ye un circuitu de carreres semiurbanu de Madrid, España, construyíu na comarca del recintu ferial d'IFEMA Madrid y Valdebebas. Inauguráu en 2026, foi diseñáu p'acoyer el Gran Premiu d'España de Fórmula 1 ente 2026 y 2035, en virtú d'un alcuerdu ente la organización del campeonatu ya IFEMA Madrid.
El trazáu tien un llargor de 5,414 km y 22 curves, y combina tramos construyíos específicamente pal circuitu con víes públiques. Una vuelta percuerre espacios d'IFEMA, Valdebebas y la cai Ribera del Sena, con zones d'alta velocidá nes que los monoplaces pueden algamar unos 340 km/h. Ente los sos elementos más carauterísticos ta la curva 12, conocida como La Monumental, una curva semicircular de 550 metros de llargura y un peralte máximu del 24 %.
La construcción del circuitu empezó en 2025 y tuvo a cargu d'una unión temporal d'empreses formada por Acciona y Eiffage. El proyeutu contempló unos 4,1 km de trazáu dientro de los terrenos d'IFEMA Madrid y unos 1,3 km sobre víes públiques, siguiendo los requisitos d'homologación de grau 1 de la Federación Internacional del Automóvil (FIA).
Madring acoyó'l so primer Gran Premiu d'España de Fórmula 1 del 11 al 13 de setiembre de 2026. La carrera dispútase a 57 vueltes, con una distancia total de 308,399 km. La llegada del campeonatu supunxo'l regresu de la Fórmula 1 a Madrid 45 años dempués de la última edición disputada nel Circuitu del Jarama en 1981.
Referencies
Enllaces esternos
Categoría:Circuitos de Fórmula 1 Categoría:Circuitos d'automovilismu d'España Categoría:Deporte en Madrid Categoría:Instalaciones deportives de Madrid