Honorino García Fernández , más conocíu como Norino'l Gaiteru, foi un gaiteru de Sotrondio, Asturies.
Delles notes biográfiques Blas Honorino García Fernández, nació'l diecisiete de setiembre de 1917, en L'Alcargu, Sotrondio, conceyu de Samartín del Rei Aurelio. Norino venía de raza de gaiteros: so pa, Leandro García Rodríguez, Leandrón (1885-1947), facía gaites (hubiere deprendío con Manuel Ablanedo, Manolín de la Carrera) amás de tocales y foi maestru de los sos fíos Arturo y Belarmino. Pero magar que tenía en casa quién-y deprendiere y instrumentu pa ello, la cosa foi que Norino emprincipió solu a tocar.
Inda con nueve años, echóse p'alantre y na romería de Blimea, atrevióse a pedí-y la gaita al gaiteru Marcelo l'Avicucu pa tocar dellos cantarinos de la dómina que yá sabía. La novedá del rapacín gaiteru espardióse pela fiesta y llegó a oyíos del pá, que se presentó aende mui llueu y mandó-y tocar. Norino echó la gaita al costazu, contando que'l pá diba regañalu, pero n'acabando de tocar, dixo-y: "Fiyu, mañana perfáigote una gaita" Y esa foi la primer gaita que tuvo.
Naquella dómina, pel branu, yera costume dir la mocedá los domingos a La Campeta a baillar hasta l'atapecer, y llevánbenlu a él y al tamboriteru Guillermo de Cabañesnueves. Nun ganaba gran cosa: nos díes meyores, marchaba pa casa con tres reales que-y pagaben a escote y que repartía col tamboriteru.
Videos Norino con la Bandina en Gente. Norino'l Gaiteru presentó'l so discu na Casa Conceyu de Xixón.
Referencies
Enllaces esternos
Categoría:Gaiteros y gaiteres d'Asturies Categoría:Persones de Samartín del Rei Aurelio