La masacre del pozu Funeres foi un conxuntu d'execuciones estraxudiciales de persones sospechoses de collaborar cola guerrilla antifranquista per parte de falanxistes y axentes de la Guardia Civil, ente marzu y abril de 1948. Les víctimes fueron nueve militantes y parientes de militantes d'esquierda, que fueron asesinaes al pie d'una torca de la Sierra de Peñamayor conocida como'l pozu Funeres –nel conceyu asturianu de Llaviana– y refundiaes al cuévanu.

Antecedentes thumb|300px|Árees d'actuación del maquis.

Mientres la Guerra Civil y sobre manera tres la victoria franquista en 1939, los «fuxíos» constituyeron en diversos puntos d'España movimientos guerrilleros col ánimu d'apexar l'afitamientu de la dictadura de Francisco Franco y, n'última instancia, derrocala. Paralelamente, l'exiliu republicanu en Francia viose sorprendíu pol españíu de la Segunda Guerra Mundial, y al producise la ocupación del país galu poles fuercies de la Exa, munchos excombatientes pasaron a engrosar les files de la resistencia francesa, considerando aquella llucha un preludiu del combate pa lliberar España.

Nel intre de la conflagración global y cada vez más cercana la desapaición de los estaos de la Exa, los republicanos españoles vieron crecer les sos mires d'una intervención aliada contra Franco. Asina, amontáronse les actividaes del maquis y llanzóse en 1944 la invasión del Valle d'Arán, que magar el so fracasu nun fixo aparrar la moral de les partíes qu'entamaben los anarquistes, el Partíu Comunista d'España y el Partíu Socialista Obreru Español (PSOE). El gobiernu franquista retrucó con un recrudecimiento de la represión nes zones afeutaes por aquelles y la promulgación de la Llei de Bandidaje y Terrorismu.

N'Asturies, la oposición articuló dos guerrilles, la comunista y la socialista, qu'ente 1943 y 1944 intentaron coordinar los sos esfuercios por aciu l'establecimientu del Comité de Milicies Antifascistes d'Asturies, infructuosamente. Mentanto formóse la «brigadilla», una organización parapolicial compuesta de falanxistes y axentes de la Guardia Civil qu'operaba contra la insurxencia del maquis nel territoriu del Principáu.

La masacre

La primer versión rellatando les circunstancies de la masacre foi publicada nun informe a la direición del PSOE nel exiliu, nel que se basaría El Socialista pal so exemplar del 1 de xunetu de 1948. Nella esponía la detención y tortura pola «brigadilla», ente marzu y mayu de 1948, de 22 mineros asturianos que fueron finalmente refundiaos vivos al pozu Funeres pola so militancia socialista. Como nun finaren toos nel actu, al cabu d'unos díes los miembros del grupu executor tornaron con cartuchos de dinamita y gasolina, y callaron los berros agónicos prendiendo fueu sobre ellos a les sustancies que traíen consigo.

Les socesives investigaciones de los historiadores tendieron a amenorgar aquella cifra de 22 persones asesinaes, anque se caltuvo como la más reproducida poles obres que trataron dempués la represión franquista. Asina, Yusta Rodrigo (2008) refier «siquier 18», y García Piñeiro (2015) cita 9:

Víctima Fecha de fallecimientu Conceyu d'orixe Adscripción ideolóxica Erasmo Alonso Martínez 24/03 Llaviana Comunista Fernando Carrio Martínez 24/03 Llaviana Comunista Fermín Concheso Alonso 24/03 Llaviana Comunista Silvino Díaz Menéndez 14/04 Samartín del Rei Aurelio Socialista Jesús García Iglesias 14/04 Samartín del Rei Aurelio Socialista Ceferino González Concheso 24/03 Llaviana Comunista Antonio González García ~26/03 Llaviana Nenguna Ramón Rodríguez Argüelles 13/04 Bimenes Socialista Enrique Suárez Fernández 14/04 Samartín del Rei Aurelio Socialista Fonte: García Piñeiro (2015).

Na reconstrucción de los fechos que practica García Piñeiro, Erasmo Alonso Martínez sería la primer víctima, deteníu'l 21 de marzu por causa del so parentescu con un enllaz de la guerrilla, la so madre, y un guerrilleru mesmu, el so hermanu. Al nun facilitar información, foi muertu d'un disparu'l 24 y precipitáu a la torca. Aquel mesmu día seríen arrestaos y sufriríen esi destín al nun confesar Fernando Carrio Martínez, Fermín Concheso Alonso y Ceferino González Concheso, de los cualos esti postreru fuera nel pasáu un «fuxíu» y actuaba agora como enllaz.

Escontra'l 26 de marzu yera deteníu y refundiáu al foso Antonio González García, ensin nenguna militancia pero primu de dos maquis, a quien se-y supunxo autor de los llamentos qu'alvirtieron los paisanos y que fueron acallantaos polos esplosivos y la gasolina. Al mes siguiente, Ramón Rodríguez Argüelles yera executáu y llanzáu al pozu Funeres Ramón Rodríguez Argüelles. A lo último, na xornada siguiente fueron muertos y sumíos –anque nun ye totalmente seguro que fora na torca– Silvino Díaz Menéndez, Jesús García Iglesias y Enrique Suárez Fernández. García Piñeiro refuga coles mesmes la militancia socialista de cuatro de los executaos como'l móvil de los victimarios, señalando nel so llugar al barruntu de que los primeres tuvieren ayudando a la guerrilla comunista.

Repercusiones

En respuesta a la masacre, el líder del maquis socialista José Mata Castro aprobó aiciones d'asesinatu contra dalgunos de los responsables, pero l'impautu de la mesma y la percibida ineficacia de la insurxencia convenció a la executiva del PSOE a sacupar a los sos guerrilleros d'Asturies escontra Francia y camudar la so estratexa. D'esta manera, y anque nun foi la única execución coleutiva perpetada mientres la dictadura nesti periodu, sí foi la más espublizada, por cuenta de les xestiones poles que Indalecio Prieto fixo informar a les embaxaes occidentales en Madrid. Asina, per mediu de Teodomiro Menéndez fíxose llegar a la delegación británica un informe de la matanza redactáu por José Mata, del que Prieto se sirvió pa denunciar al réxime ante la Organización de les Naciones Xuníes.

La Federación Socialista Asturiana, Mocedaes Socialistes d'Asturies y la Unión Xeneral de Trabayadores realicen cada añu un homenaxe nel escenariu del socesu, nel que dende 1976 asítiase un monumentu en conmemoración a los finaos, inauguráu aquel añu en presencia del secretariu xeneral del PSOE Felipe González. En 2016, nel contestu del procesu xudicial abiertu n'Arxentina contra los crímenes del franquismu, la fía d'una de les víctimes del pozu Funeres solicitó la exhumación de los restos mortales del so padre.

Referencies

Categoría:Historia d'Asturies Categoría:Llaviana Categoría:Maquis (guerrilla antifranquista) Funeres