Міхась Яськевіч ( — ) — беларускі грамадскі дзеяч у Вялікабрытаніі.
Біяграфія Нарадзіўся 17 сакавіка 1926 года у вёсцы Стаўпішчы Нясвіжскага павета Навагрудскага ваяводства ў Польскай Рэспубліцы (цяпер Нясвіжскі раён Мінскай вобласці).
У Другую сусветную вайну падчас нямецкай акупацыі скончыў два курсы настаўніцкай семінарыі. Быў курсантам Мінскай афіцэрскай школы БКА, разам з якой быў далучаны да 30-й грэнадзёрскай дывізіі пры СС. Перайшоў на бок саюзнікаў. У 1944—1947 гг. служыў у Другім Польскім корпусе.
У 1946 годзе разам з Другім Польскім корпусам прыбыў у Вялікабрытанію. Пасяліўся ў Манчэстэры. Ад 1 кастрычніка 1946 года быў сябрам Згуртавання беларусаў у Вялікабрытаніі, уваходзіў у аддзел у Манчэстэры, у кіраўніцтве якога шмат гадоў займаў пасаду сакратара, а часам абіраўся і на старшыню. Ад 1951 г. сябра Згуртавання беларускіх камбатантаў, кіраваў дружынай у Манчэстэры. Быў актывістам БАПЦ. У другой палове 1950-х быў старшынём Манчэстэрскага аддзела брацтва і сястрыцтва Жыровіцкай Божай Маці. У 1958—1961 гг. — настаўнік беларускай суботняй школкі ў Манчэстэры. Уваходзіў у кіраўніцтва Беларускага клуба ў Манчэстэры (сакратар). Доўгія гады быў карэспандэнтам газет «Бацькаўшчына» і «Беларус» у Манчэстэры, падпісваўся псеўданімам Міхась Стаўпіскі.
Памёр 9 чэрвеня 2002 года. Пахаваны ў Манчэстэры на Паўднёвых могілках.
Літаратура Гардзіенка Н. Беларусы ў Вялікабрытаніі / пад рэд. А. Гардзіенкі. — Мн,, 2010. Запісы. Беларускі інстытут навукі і мастацтва, № 37 New York — Miensk, 2014
Спасылкі Візытоўка Міхася Ясьцевіча як сакратара Манчэстарскага аддзелу ЗБВБ. Манчэстэр
Катэгорыя:Члены Згуртавання беларусаў у Вялікай Брытаніі Катэгорыя:Члены Беларускай краёвай абароны Катэгорыя:Члены 30-й грэнадзёрскай дывізіі войскаў пры СС