Ганна Мікалаеўна Атрошчанка (нар. 20 жніўня 1949, пас. Чырвоны Рог, Добрушскі раён, Гомельская вобласць) — беларуская пісьменніца і журналістка.
Біяграфія Нарадзілася ў 20 жніўня 1949 года ў пасёлку Чырвоны Рог Добрушскага раёна. Маленства праходзіла ў вёсцы Перарост у роднай бабулі Марыі Максімаўны.
Працавала на будоўлі, на Гомельскім заводзе пускавых рухавікоў, потым у рэдакцыях гарадскіх газет: «Вестник района», «Гомельскі веснік», «Советский район», шматтыражцы «Сельмашавец». Працавала карэспандэнтам, адказным сакратаром газеты, намеснікам галоўнага рэдактара.
Член Гомельскага абласнога аддзялення праўладнага Саюза пісьменнікаў Беларусі і Беларускага саюза журналістаў, Міжнароднага саюза пісьменнікаў і майстроў мастацтваў.
Творчасць Піша на беларускай і рускай мовах. Актыўна друкавалася ў мясцовых і рэспубліканскіх сродках масавай інфармацыі. Аўтар 20-ці зборнікаў паэзіі і прозы, якія пабачылі свет у розныя гады. Гэта: «Асеннія мары», «Сустрэча», «Жытнёвыя каласы», «Чырвоны Рог», «Арыёза жыцця», «Жыццёвая гісторыя», «Летуценніца», «Лавровишня», «Ветрагон», кніжкі для дзяцей «Дома і салома ядома», «Казачны ласунак», «Падарунак» і іншыя.
Многія вершы Ганны Атрошчанкі перакладзены на рускую і ўкраінскую мовы, гучалі па рэспубліканскаму і абласному радыё. Мясцовыя кампазітары напісалі на яе вершы рамансы і песні, якія выконваюцца на розных гарадскіх і святочных мерапрыемствах.
Узнагароды У 1996 годзе была пераможцай конкурсу, які праводзіў часопіс «Вожык», а ў 2007 годзе стала дыпламантам літаратурнага конкурсу, арганізаванага часопісам «Алеся». За ўдзел у абласным літаратурным конкурсе ў 2009 годзе «Пад мірным небам — 65 вёсен», узнагароджана заахвочвальным дыпломам, адзначана падзячным лістом за паэтычны зборнік «Арыёза жыцця». Лаўрэатка і дыпламантка міжнародных, рэспубліканскіх і абласных конкурсаў. За плённую працу на літаратурнай ніве ўзнагароджаная юбілейным нагрудным знакам «За ўклад у станаўленне і развіццё аддзялення», памятным медалём «Кірыла Тураўскі. Асветнік. За ўклад у літаратуру» і памятным медалём за ўдзел ва Усерасійскім штогадовым конкурсе «Героі Вялікай Перамогі».
Спасылкі Старонка на Вершы.ru
Катэгорыя:Пісьменніцы Беларусі Катэгорыя:Беларускамоўныя пісьменнікі Катэгорыя:Журналісты Беларусі