Арму́з (перс. جزیره هرمز Хармо́з) — востраў у Армузскім праліве. Адміністрацыйна ўваходзіць у склад іранскай правінцыі Хармазган. Плошча — 41,9 км²Hormoz Island in Hormozgan province.
Гісторыя Востраў вядомы з антычных часоў пад назвамі Аргана. У XIII ст. населены выхадцамі з узбярэжнага горада Армуза, разбуранага манголамі. Іх паселішча, а потым увесь востраў атрымалі назву Новы Армуз або проста Армуз. Тут усталявалася мясцовая правячая дынастыя, якая спрыяла развіццю гандлю паміж краінамі Персідскага заліву, з Індыяй, Зондскім архіпелагам і Кітаем.
У перыяд росквіту насельніцтва вострава дасягала 50 тыс. чалавек. Сюды наведваліся Марка Пола, Афанасій Нікіцін, Ібн Батута і іншыя вядомыя вандроўнікі.
У 1507 г. захоплены партугальцамі, якія пабудавалі буйное ўмацаванне Маці Божай Кансепсьёнскай і кантралявалі з яго дапамогай гандлёвыя сувязі з Персідскім залівам.
У 1622 г. быў захоплены іранскім шахам Абасам I з дапамогай англічан і значна разбураны.
У XVIII—XIX стст. уваходзіў у склад Амана. У 1868 г. зноў далучаны да Ірана.
Прырода Востраў знаходзіцца ў Армузскім праліве на паўночны ўсход ад буйнога вострава Кешм. Складзены пераважна з асадкавых і старажытных вулканічных парод. Берагі пясчаныя, часткова занятыя скальнымі масівамі. Найвышэйшы пункт — 186 м. Са старажытных часоў на востраве здабываецца охра.
Флора і фаўна бедныя, прадстаўленыя паўпустыннай расліннасцю, змеямі, яшчаркамі, марскімі птушкамі. Глебы месцамі засоленыя. На востраве маецца недахоп пітной вады.
Насельніцтва На востраве стала жыве каля 2,5 тыс. чал. (2007 г.), у асноўным арабы-бандары́ і персы.
Эканоміка Асноўныя заняткі — лоў рыбы і рамесная вытворчасць, у тым ліку будаўніцтва традыцыйных суднаў. Значная частка астравіцян сезонна працуе ў іншых раёнах Ірана і ААЭ. Іншаземны турызм не развіты з-за адсутнасці гасцініц і іншай інфраструктуры.
Галерэя
Спасылкі Рай для мастакоў Гісторыя
Катэгорыя:Астравы паводле алфавіта Катэгорыя:Астравы Персідскага заліва Катэгорыя:Астравы Ірана