Isabel Díaz Ayuso, nada en Madrid o 17 de outubro de 1978, é unha política española do Partido Popular, presidenta da Comunidade de Madrid dende agosto de 2019.
Traxectoria Nada o 17 de outubro de 1978 en Madrid no seo dunha familia residente no distrito de Chamberí, os seus pais dedicábanse ao comercio de artigos médicos. Licenciada en xornalismo pola Universidade Complutense de Madrid (UCM), fixo un mestrado en comunicación política e protocolo. Afiliada ao Partido Popular (PP) en 2005, cando Pablo Casado era o presidente de Novas Xeracións en Madrid, en 2006 foi fichada por Alfredo Prada, conselleiro de Xustiza e Interior do Goberno da Comunidade de Madrid, para o seu departamento de prensa, onde conseguiu a confianza de Esperanza Aguirre para a que creou e xestionou a conta de Twitter do seu can, Pecas. Especializada en comunicación política, dirixiu a área en liña do PP e estivo ao cargo da campaña dixital de Cristina Cifuentes en 2015. Casada e divorciada con anterioridade, mantivo unha relación co perruqueiro Jairo Alonso dende 2016 até novembro de 2020.
Carreira política Candidata da lista do PP para as Eleccións á Asemblea de Madrid de 2011, non resultou elixida como deputada. Porén entrou no parlamento rexional o 15 de xullo para cubrir a vacante por renuncia de Engracia Hidalgo. Renovou a súa acta de deputada nas eleccións rexionais de 2015. Durante dita X lexislatura exerceu de voceira adxunta do seu grupo, posición que abandonou xunto coa súa condición de deputada con motivo do seu nomeamento como viceconselleira de Presidencia e Xustiza dio goberno rexional.
O 11 de xaneiro de 2019 coñeceuse a decisión do presidente do PP, Pablo Casado, de nomeala cabeza de lista do seu partido de cara ás Eleccións á Asemblea de Madrid de 2019, postulándose así como candidata á presidencia da Comunidade de Madrid. miniatura|esquerda|Díaz Ayuso intervindo durante a sesión do pleno correspondente á súa investidura como presidenta rexional. Nas eleccións do 26 de maio de 2019, a lista do PP obtivo un 22,23 % de votos válidos e 30 escanos, sendo a segunda lista máis votada despois da do PSOE, lista máis votada cun 27,31 % de votos válidos e 37 escanosXunta Electoral Provincial de Madrid: . Pese a quedar por detrás dos socialistas sumaba maioría absoluta con Ciudadanos e Vox para conservar o goberno, se ben este acordo tardou en chegar.
Desta forma, mentres o acordo non fructificaba o presidente da Asemblea de Madrid Juan Trinidad (Ciudadanos) programou unha insólita sesión de investidura sen candidato en xullo de 2019, sen sequera darlle a oportunidade ao candidato gañador, o socialista Ángel Gabilondo, de poder presentarse aínda que a priori contase co rexeitamento da maioría dereitista da cámara. Finalmente o acordo frutificou e o 14 de agosto foi investida como presidenta do Goberno rexional con 68 votos a prol (correspondentes aos deputados dos grupos parlamentarios Popular, de Ciudadanos e Vox en Madrid) e 64 en contra (correspondentes aos deputados dos Grupos Parlamentarios Socialista, Más Madrid e Unidas Podemos-Esquerda Unida-Madrid en Pie). Desta forma conformou un goberno de coalición con Ciudadanos co apoio externo de Vox.
En marzo de 2021, ante unha suposta ameaza de moción de censura da esquerda apoiada polo seu socio Ciudadanos decidiu expulsar a esta formación do goberno e convocar eleccións para o 4 de maio. En ditas eleccións, a candidatura do Partido Popular acadou unha contundente vitoria con 1.620.213 votos (44,3% dos votos emitidos), que lle outorgaron 65 deputados da Asemblea, máis do dobre que os acadados nas anteriores eleccións. Se ben non conseguiu a maioría absoluta que ostentara anos atrás o partido por 4 escanos, en termos absolutos trátase do maior número de votos da historia para calquera candidatura nunhas eleccións á Asemblea de Madrid, superando os récord de apoio de Esperanza Aguirre no 2007 grazas ao récord de participación tido lugar na xornada electoral. Desta forma foi reelixida co apoio de Vox, conformando un goberno monocolor co apoio externo de dito grupo.
Nas Eleccións á Asemblea de Madrid de 2023 logrou a maioría absoluta con 70 escanos dos 135 da cámara autonómica, se ben logrou un menor número de votos dado o descenso de participación, subindo en porcentaxe de voto ata un 47%.
Notas
Categoría:Nados en 1978 Categoría:Nados en Madrid Categoría:Políticos do PP Categoría:Alumnos da Universidade Complutense de Madrid Categoría:Deputados da IX Lexislatura da Asemblea de Madrid Categoría:Deputados da X Lexislatura da Asemblea de Madrid Categoría:Deputados da XI Lexislatura da Asemblea de Madrid Categoría:Presidentes da Comunidade de Madrid