Félix Gila Esteban, nado en Donostia o 20 de novembro de 1895, foi un masaxista e adestrador de fútbol español. Foi un dos primeiros adestradores do Deportivo da Coruña, ao que dirixiu en catro etapas, gañando tres Campionatos de Galicia.
Traxectoria Despois de traballar como masaxista no Betis trasladouse á Coruña en 1926, para ser o novo masaxista e adestrador do Deportivo da Coruña. O club coruñés reforzouse para esa tempada 1926/27 do Campionato de Galicia con varios xogadores. Chegou Fernando Fariña do Eiriña, Ramón Rey e Redondela do Pontevedra Athletic, e Chaco da Cultural Leonesa. Gañou 12 dos 16 partidos e proclamouse por primeira vez na súa historia campión de Galicia, logrando o título a falta de dúas xornadas, despois de vencer nun derbi contra o Celta de Vigo con dous goles de Ramón González e Joaquín Vázquez.
Deixou o equipo ao remate da tempada, regresando brevemente en 1928. En 1930 comezou a súa terceira etapa no club, que durou tres anos e na que conquistou dous títulos máis do campionato galego (1930/31 e 1932/33). Continuou como masaxista no club ata xaneiro de 1934, cando presentou a súa dimisión. Volveu en decembro do mesmo ano, adestrando o equipo durante uns meses.
En decembro de 1935 converteuse en adestrador do Stadium Avilesino, ao que dirixiu durante unha tempada.
Traballou tamén como crítico deportivo para La Voz de Galicia.
Palmarés Deportivo da Coruña
Campionato de Galicia (3): 1926/27, 1930/31, 1932/33.
Notas
Véxase tamén Ligazóns externas
Datos do adestrador en BDFutbol .
Categoría:Nados en Donostia Categoría:Nados en 1895 Categoría:Adestradores de fútbol do País Vasco Categoría:Adestradores do Deportivo da Coruña Categoría:Adestradores do Real Avilés Categoría:Finados en ano descoñecido