Ryō Mizuno (xaponés: 良水野), pseudónimo de Takeshi Enomoto (xaponés: 武士榎本), nado o 13 de xullo do 1963, é un escritor e deseñador de xogos xaponés. É recoñecido como creador da franquía Rōdosu-tō senki.
Traxectoria Ryō Mizuno naceu en Osaca no 1963, o máis novo de tres irmáns. Licenciouse en Dereito pola Universidade Ritsumeikan. Durante esta época, comezou a interesarse polos xogos de rol, e formou un grupo de rol chamado Shintakkusu erā (シンタックスエラー, lit. "Erro de sintaxe"), xunto con Hiroshi Yamamoto. Participou na creación da empresa グループSNE ("Grupo SNE"), que se dedica ao deseño de xogos de rol.
Fixo o seu debut como novelista con Rōdosu-tō senki: haiiro no majo ロードス島戦記：灰色の魔女 ("Crónicas da guerra de Lodoss: a bruxa gris", 1988), que se publicou por entregas na revista Conputīku コンプチーク. Este libro converteuse nun éxito de vendas, acadando máis dun millón de copias. Está considerado un dos principais impulsores da fantasía no eido das novelas lixeras.
Todas as obras da franquía Rōdosu-tō senki están ambientadas no mundo de Forcelia, creado por Mizuno para os xogos de SNE. Conta cun gran seguimento no Xapón, onde as novelas da saga levan vendidos máis de 10 millóns de exemplares, a data de 2017.
Notas
Categoría:Escritores do Xapón Categoría:Nados en 1963 Categoría:Escritores en lingua xaponesa