Nubia Carolina Córdoba Curí, nada en Quibdó o 17 de xuño de 1990, é unha política e avogada colombiana, que exerce como gobernadora do departamento de Chocó dende xaneiro de 2024.
Traxectoria Naceu en Quibdó, no seo dunha familia de políticos afiliados ao Partido Liberal. O seu pai foi o congresista Darío Córdoba Rincón, que morreu nun accidente aéreo en 2003, a súa nai Elizabeth Curí foi cinco veces deputada na Asemblea Departamental de Chocó. É sobriña de Piedad Córdoba e Carlos Alberto Escobar Córdoba, ámbolos dous congresistas na década de 2000.
Estudou Dereito na Universidade Externado de Colombia, en Bogotá, mesma institución na cal se especializou en dereito medioambiental. Tamén posúe un mestrado en Planificación Territorial da Universidade de Barcelona e un doutoramento (non culminado) en política e goberno da Universidade Católica de Córdoba (na Arxentina).
A maior parte da súa carreira profesional fíxoa como docente catedrática e investigadora. Así mesmo, traballou para o Ministerio de Ambiente, o Ministerio de Cultura e a Unidade Nacional para as Vítimas.
Como membro do Partido Liberal, foi candidata á Cámara de Representantes de Colombia nas eleccións lexislativas de 2018, sen éxito. Nas eleccións rexionais de 2019 foi xerente de campaña do Gobernador Ariel Palacios Calderón, quen, unha vez electo, a nomeou Secretaria do Interior e Secretaria de Goberno de Chocó.
Nas eleccións rexionais de 2023 presentouse como candidata á Gobernación de Chocó polo Partido Liberal. Nunha contenda igualada, logrou vencer ao exgobernador Patrocinio Sánchez Montes de Oca, obtendo 102.349 votos, equivalentes ao 49,57% do total. Así, converteuse na primeira muller en ser elixida ao cargo por votación popular. Durante os seus primeiros días de xestión tivo que enfrontar un alude de terra na vía Medellín-Quibdó á altura do concello de El Carmen de Atrato.
Notas
Véxase tamén
Ligazóns externas Ficha da Federación Nacional de Departamentos
Categoría:Nados en 1990 Categoría:Nados en Quibdó Categoría:Alumnos da Universidade de Barcelona Categoría:Alumnos da Universidade Externado de Colombia Categoría:Alumnos da Universidade Católica de Córdoba Categoría:Avogados de Colombia Categoría:Gobernadores de Chocó Categoría:Políticos de Colombia Categoría:Colombianos de ascendencia africana