José Miguel Azevedo Cardoso, máis coñecido como Miguel Cardoso, nado en Trofa o 28 de maio de 1972, é un adestrador de fútbol portugués. Na tempada 2026/27 dirixe o Mamelodi Sundowns F.C. da Liga Premier de Sudáfrica.

Traxectoria como adestrador Primeiros anos Nado en Trofa, Cardoso especializouse en educación física e ciencia do deporte na Universidade do Porto, obtendo un grao en 1985 e un mestrado en 1988. Comezou a súa carreira en 1993 como adestrador do equipo sub-12 do Sporting Clube de Espinho.

En 1996 foi contratado como asistente de Fernando Freitas no equipo sub-10 do FC Porto. En 1999 pasou a formar parte do equipo técnico do FC Porto B e en 2003 comezou a dirixir o equipo sub-15.

En abril de 2004 incorporouse no cadro técnico do primeiro equipo do Clube de Futebol Os Belenenses. O 10 de maio de 2006 acompañou o exadestrador do Belenenses, Carlos Carvalhal, para o seu equipo técnico no SC Braga.

En setembro de 2007 foi contratado como asistente de Domingos Paciência no Académica de Coimbra. Nos seguintes anos desempeñou o mesmo cargo con Paciência no Braga, no Sporting Clube de Portugal e no Deportivo da Coruña.

Shakhtar Donetsk O 12 de xuño de 2016 fíxose oficial a chegada de Cardoso ao Shakhtar Donetsk como adestrador do equipo sub-21 e coordinador da estrutura xuvenil. Na tempada 2016/17 foi nomeado asistente de Paulo Fonseca para o primeiro equipo.

Cardoso saíu do club ucraíno o 8 de xuño de 2017.

Primeira etapa no Rio Ave O 12 de xuño de 2017 foi contratado polo Rio Ave da Primeira Liga para dirixir o equipo en substitución de Luís Castro. Tras conseguir tres vitorias e un empate contra o S.L. Benfica nos seus primeiros catro partidos, Cardoso foi nomeado adestrador do mes en agosto de 2017.

Baixo a dirección de Cardoso, a tempada 2017/18 foi a mellor campaña do Rio Ave na súa historia deportiva na Primeira Liga: quinta posición (igualando a tempada 1981/82 con Félix Mourinho), 51 puntos (superando os 50 puntos da tempada 2015/16 con Pedro Martins) e unha clasificación para a UEFA Europa League.

Nantes O 13 de xuño de 2018 substituíu Claudio Ranieri como novo adestrador do FC Nantes da Ligue 1. Cardoso abandonou o club o 2 de outubro dese ano, após conseguir só seis puntos en oito partidos.

Celta de Vigo O 12 de novembro de 2018 tomou o relevo de Antonio Mohamed como adestrador do Celta de Vigo da Primeira División. Na súa primeira conferencia de prensa co Celta, Cardoso recibiu atención mediática ao presentarse erroneamente como adestrador do Deportivo da Coruña.

O 3 de marzo de 2019 anunciouse a súa saída do Celta, co club galego a tan só dous puntos da zona de descenso.

AEK Atenas O 28 de maio de 2019 asinou un contrato de dous anos co AEK Atenas FC da Superliga de Grecia como novo adestrador do equipo tras a saída de Manolo Jiménez. O 25 de agosto dese ano marchou do club tras só catro partidos, o seu terceiro despedimento en doce meses.

Segunda etapa no Rio Ave Após un ano sen traballo, Cardoso regresou ao Rio Ave o 29 de xaneiro de 2021 cun contrato de 18 meses. Tras concluír a tempada 2021/22, na que o Rio Ave perdeu unha eliminatoria contra o Arouca e resultou descendido, Cardoso foi despedido polo club portugués.

Espérance de Tunis O 12 de xaneiro de 2024 anunciouse a chegada de Cardoso ao Espérance Sportive de Tunis do [Championnat de Ligue Profesionelle 1]] como novo adestrador tras a marcha de Tarek Thabet. Cardoso saíu do club en decembro de 2024 tras un mal inicio de tempada do Espérance.

Mamelodi Sundowns En decembro de 2024 foi fichado polo Mamelodi Sundowns F.C. da Liga Premier de Sudáfrica. Na tempada 2024/25 o equipo conseguiu o primeiro posto na primeira división sudafricana e foi finalista na Liga de Campións da CAF. Na campaña 2025/26 o Mamelodi Sundowns foi gañador da Liga de Campións e finalizou no segundo posto da Liga Premier de Sudáfrica.

Palmarés Espérance de Tunis Championnat de Ligue Profesionelle 1: 2023/24

Mamelodi Sundowns Liga Premier de Sudáfrica: 2024/25 Liga de Campións da CAF: 2025/26

Notas

Véxase tamén Ligazóns externas Web oficial de Miguel Cardoso

Categoría:Nados en 1972 Categoría:Nados no distrito do Porto Categoría:Adestradores de fútbol de Portugal Categoría:Adestradores do Celta de Vigo Categoría:Adestradores do FC Nantes Categoría:Adestradores do AEK Atenas FC