La scricciura l’è l’azzion de fà su una representazzion del lenguasg uman che la saga de durada. Un sistema de scricciura el dœuvra una serie de simboi e regole per codifegà dei aspet de la lengua parlada, compagn del lessegh e de la sintass. Impunemanca, la lengua scrivuda la pœul anca ciapà di carataristeghe spartide de chelle insubide de la lengua parlada.
La scricciura l’è un’ativitaa cognitiva e sozzial che l’invœulv di prozzess neuropsicologegh e fisegh. El resultad de chest’ativitaa – de norma ciamad ‘test’ – l’è un insema de simboi miss sgiò a man, strasferid intravers di machinari o representad cont el computer. Chi che lensg un test l’è ciamad ‘leccior’; chi ch’en produs vun, ‘scriccior’.
In sgeneral, i sistema de scricciura constituissen minga di lengove nete e s’cete, ma nomà un mez de codifegà un lensguasg per fàll lensger a dei oltre persone, ind una manera che la resista al temp e che la vaga fœura di siront locai. Ancaben che minga tute i lengove dœuvren un sistema de scricciura, chelle che le fa pœuden indà a completà e estender i capazzitaa de la lengua parlada cont el fosgià di forme de lensguasg che se spanteghen ind l’ispazzi – compagn de la conrespondenza scrivuda – e se mantegnen ind el temp – per esempi quand ch’inn guarnade via ind i biblioteche. La scricciura la pœul anca havégh l’efet de passà sgiò la cognossenza de una persona a l’oltra, desgià che la permet a la sgent de esternalizà i sò penser ind di forme ch’inn pussee belfà de pensàgh sora, elaborà, reconsiderà e conresger.
Refarenze
Olter proget