Umbilicus rupestris — вид повеќегодишно цветно тревесто растение кое припаѓа на родот Umbilicus од семејството дебелци (Crassulaceae). Научното име доаѓа поради кружниот облик на неговите листови, кои имаат вдлабнатина слична на папок во центарот. Растението е распространето во јужна и западна Европа.
Опис и распространетост Umbilicus rupestris е голо растение високо 20-50 см, со задебелен ризом во форма на грутка и исправено, неразгрането стебло. Листовите при основата се округли, вдлабнати, нагло преминуваат во долга дршка и рабовите им се плитко назабени; стеблените листови се малубројни, мали, со многу кратки дршки, рабовите им се ситно напилени со остри запци; прицветниците се копјести до линејни, цели по рабовите, долги колку цветните дршки или подолги. Цветовите се собрани во густо и издолжено гроздовидно соцветие кое се протега речиси по целото стебло, скоро до неговата основа; цветните дршки се долги 3-8 мм. Ливчињата на чашката се јајцевидно-триаглести, со остар врв, долги до 2 мм и во основата меѓусебно сраснати. Венчето е зеленикаво-бело или розово, цилиндрично, долго 12-15 мм и широко околу 3 мм, на врвот поделено на пет делови кои се тапи, но нагло заострени на крајот. Има 10 прашници со јасно развиени дршки. Мешунчињата (плодовите) се цилиндрични мешунки, издолжени, со многу кратко столпче.
Расте покрај карпи и каменести терени, на влажни и засенчени локации. Во Македонија се среќава во клисурата на р. Треска; клисурата на р. Бабуна; Прилеп - Маркови Кули; Мариово - мостот Расим-беј; Преспанско Езеро - островот Голем Град; Гевгелија- с. Стојаково, с. Богданци, помеѓу Стар и Нов Дојран; Кожуф - Смрдлива Вода; Беласица; Струмица - помеѓу с. Банско и с. Габрово.
Синоними Umbilicus rupestris ги има следниве синоними: Cotyledon neglecta Cout. Cotyledon umbilicus Lam. Cotyledon rupestris Salisb. Cotyledon tuberosa Halácsy Cotyledon umbilicata Lam. Cotyledon umbilicifolia Stokes Cotyledon umbilicus-veneris L. Cotyledon umbilicus-veneris var. tuberosa L. Cotyliphyllum erectum Link Cotyliphyllum umbilicus Link Umbilicus aetneus Tornab. Umbilicus deflexus Pomel Umbilicus neglectus (Cout.) Rothm. & P.Silva Umbilicus patulus Pomel Umbilicus pendulinus DC. Umbilicus simplex K.Koch Umbilicus umbilicatus (Lam.) Breistr. Umbilicus vulgaris Batt. & Trab Галерија
Наводи
Надворешни врски
Категорија:Флора на Шпанија Категорија:Флора на Либан Категорија:Флора на Европа Категорија:Флора на Македонија Категорија:Дебелци