Моника Херцег (Сисак, 1990) — хрватска поетеса, драмска писателка, сценаристка и уредничка. Добитничка е на повеќе книжевни награди, како и активистка за популаризација на науката, феминистка, заговарачка за рамноправност на жените и права на бегалците.
Животопис Моника Херцег е родена и израснала во Сисак, средно училиште завршила во Петриња, студирала физика на Универзитетот во Риека, а живее во Загреб. Сосоздавачка е на натпреварот „Квант книжевност“ на природно-математичкото здружение на студенти ПРИМУС со цел пишување трудови на популарно-научни теми. Херцег е членка на Хрватското друштво на писатели и уредничка на часописот „Поезија“.
Добитничка е на книжевната награда „Горан за млади поети“ во 2017 година и на наградата „Квирин за млади поети“ во 2018 година. Нејзината збирка поезија „Почетни координати“ е наградена со признанијата „Гран Галовиќ“, „Славиќ“ и „Мостови на Сруга“. За својата втора објавена збирка „Ловостој“ ја добила наградата „На врв на јазик“, а за своите кратки раскази и песни ги освоила и наградите „Бибер“, „Lapis Historiae“ и втората награда на фестивалот „Девински замок“, како и прва награда на регионалниот натпревар на хумористично-сатирична творба „Бал во Елемир“ во 2017 година. Во 2020 година, го напишала својот прв драмски текст со наслов „Каде се купуваат нежности“, кој го тематизира насилството над жените, меѓугенерациските трауми и односите во патријархатот, а за ова свое дело била наградена од Хрватскиот народен театар. Драмата е преведена на француски и е објавена во Франција од страна на издавачката куќа „Прозор“ на Николас Раљевиќ во март 2021 година.
Третата збирка поезија насловена „Времето пред јазикот“ ја објавила во издаваштво на издавачката куќа Фрактура и таа исто така наишла на позитивна критика и ја добила наградата „Звонко Милковиќ“. За кратката драма „Мртвите не треба да се поместуваат“ ја освоила регионалната награда „Приказни од балконот, приказни од Балканот“, а за драмата „Закопани чуда“ ја добила третата награда на Хрватскиот народен театар во Мостар. Во 2021 година, за драмата „Убиј се, тато“ ја добила наградата за драмско дело „Марин Држиќ“.hdp, Marina Vujčić, Monika Herceg i Marija Dejanović dobitnice Nagrade Marin Držić Истата година била прогласена за една од добитничките на наградата „Страшна жена“. Заедно со Барнара Матејчиќ и Дадо Ќосиќ ја води акцијата за сузбивање на насилството над бегалците. Со својата поезија учествувала на комеморацијата за Александра Зец. Таа го покренала и циклусот поетски трибини „Поетеса во петок“ каде што нагласок се става на творештвото на поетесите.
Поезијата на Херцег е преведена на повеќе од десет јазика, вклучувајќи ги англиски, германски и литвански преку европската платформа за млади поети „Версополис“. Така, во Литванија и Австрија биле издадени збирки на песни во тројазично издание. Збирка на песни била објавена и на француски јазик. Стихозбирката „Почетни координати“ е објавена и на македонски во рамки на доделувањето на наградата „Мостови на Струга“. Делата „Почетни координати“ (2020) и „Ловостој“ (2021) се објавени на македонски во издаваштво на ПНВ Публикации.
Личен живот Херцег е мажена и е мајка на две деца.
Творештво „Почетни координати“ (поезија, 2018) „Ловостој“ (поезија, 2019) „Каде се купуваат нежности“ (драма, 2020) „Времето пред јазикот“ (поезија, 2020) „Мртвите не треба да се поместуваат“ (кратка драма, 2020) „Убиј се, тато“ (драма, 2020) „Закопани чуда“ (драма, 2020)
Наводи
Надворешни врски Моника Херцег — Хрватско друштво на писателите Лично мрежно место
Категорија:Хрватски поети Категорија:Хрватски драмски писатели