La Companhiá Catalana es una tropa de mercenaris actius au començament dau segle XIV dins lo monde mediterraneu orientau. Formaa principalament de Catalans e d'Aragonés, es mai que mai conoissua per son intervencion dins l'Emperi Bizantin e per sa conquista dau ducat d'Atenas.

Istòria

La Companhiá se formèc dins lo contexte de las guerras de la Reconquista e dels conflictes mediterraneus menats per lo reiaume d'Aragon. Se caracterizèc pauc a cha pauc per lo desvolopament d'una disciplina militara eficaça, d'un important sentiment d'apertenéncia, d'una mobilitat excepcionala per l'epòca e un modele economic li permetent de se finançar gràcias a la guerra, als pilhatges e au butin. Au combat, la fòrça principala de la Companhiá èra los Almograves, una infantariá leugiera armaa de javelòts, de coteus e d'espasas cortas. Especialistas de l'emboscada e dau secutament, esitavan pas a abandonar lo prat batalhier en cas de dificultats per conservar son potenciau militar.

En 1302, la patz de Caltabellotta metèt fin a un ensemble de guerras entraïnaas per las Vespras Sicilianas. Sota la direccion de Roger de Flor, un grop d'Almograves decidèc alora de formar una companhiá autonòma activa en mar Mediterranea. En 1303, foguèron engatjats per l'emperaire bizantin Andronic II Paleoleg per combatre los Turcs Seldjoquidas en Anatolia. Obtenguèron plusors succès importants, mai lor brutalitat, lors pilhatges e lors exigéncias financieras entraïnèron rapidament de tensions amb la populacion e la cort imperiala. En 1305, lo govern bizantin organizèc donc una emboscada per assassinar Roger de Flor e la màger part dels oficiers de la Companhiá. Pasmens, la tropa estacionaa a Gallipòli resistissèc a las atacas bizantinas. Comencèc alora l'episòdi de la « vennjança catalana ».

Durant plusors annaas, los mercenaris de la Companhiá pilhèron Tràcia e diversas possessions bizantinas per subreviure dins la region. Aqueu periòde veguèc una evolucion de la Companhiá qu'integrèc pauc a cha pauc de mercenaris orientaus, comprés una cavalariá leugiera turca, dins sos rengs. Finalament, la tropa se dirigissèc vers Grècia onte lo duc d'Atenas, Gautier V de Brienne, l'engatjèc per combatre sos enemics. Pasmens, refusèc de pagar la totalitat de las sòldas previstas, çò que menèc a una revòuta novela. Lo conflicte foguèc breu. Lo 15 de març de 1311, l'armaa de Gautier foguèc anientaa a la batalha dau lac Copaïs e los mercenaris prenguèron lo contraròtle dau ducat d'Atenas. Per legitimar lor poder, se placèron sota la proteccion de la corona d'Aragon.

Annexas

Ligams internes

Atenas. Emperi Bizantin.

Bibliografia

(fr) Ramon Muntaner, Les Almogavres : l'expédition des Catalans en Orient, Anacharsis, 2002.

Nòtas e referéncias