«Сусве́тная прэ́мія саўндтрэ́каў» () — кінапрэмія, якая прысуджаецца за музыку, напісаную для фільмаў. Прэмія была створана ў 2001 годзе Сусветнай акадэміяй саўндтрэкаў () і прысуджаецца штогод у сярэдзіне кастрычніка ў Генце (Бельгія) падчас Генцкага міжнароднага кінафестывалю. «Сусветную прэмію саўндтрэкаў» часта называюць самай прэстыжнай узнагародай кінамузыкі ў свеце.
«Сусветная прэмія саўндтрэкаў» прысуджаецца ў некалькіх катэгорыях, тры з якіх лічацца найбольш важнымі: «Кінакампазітар года», «Найлепшы саўндтрэк» і «Найлепшая арыгінальная песня». Сярод іншых узнагарод ёсць прэмія «Адкрыццё года», «Прэмія за прыжыццёвыя дасягненні», «Прэмія глядацкіх сімпатый», прэмія «Найлепшы малады еўрапейскі кампазітар» (з 2009 года). Іншыя ўзнагароды прысуджаліся на спецыяльнай ці нерэгулярнай аснове, напрыклад, прэмія «Найлепшы малады бельгійскі кампазітар» (прысуджалася ў 2004, 2005 і 2008 гадах) або спецыяльны прыз (прысуджаўся толькі ў 2004 годзе).
Найбольшую колькасць узнагарод «Сусветнай прэміі саўндтрэкаў» на сённяшні дзень мае французскі кампазітар Аляксандр Дэспла, які пяць разоў быў прызнаны найлепшым кампазітарам года (2007, 2009, 2010, 2011 і 2014) і тройчы атрымліваў узнагароду за найлепшы саўндтрэк (2009, 2010 і 2014). Амерыканец Джон Уільямс быў узнагароджаны чатыры разы ў трох розных катэгорыях. Амерыканец Рэндзі Ньюман быў тры разы ўдастоены ўзнагароды ў намінацыі «Найлепшая арыгінальная песня».
Крыніцы
Спасылкі Афіцыйны сайт «Сусветнай прэміі саўндтрэкаў»
Катэгорыя:Кінапрэміі Бельгіі Катэгорыя:Кінапрэміі за найлепшую музыку Катэгорыя:Музычныя прэміі Катэгорыя:З’явіліся ў 2001 годзе