Планета — гасцініца ў Мінску, размешачаная па праспекце Пераможцаў, 31. Пабудавана ў 1980 годзе па праекце архітэктараў Г. Бенядзіктава, У. Начарава, Т. Раманоўскай са зборнага жалезабетону.
Архітэктура Дынамічная аб’ёмна-прасторавая кампазіцыя складаецца з дванаццаціпавярховага жылога корпуса (на 601 месца) і двухпавярховага аб’ёма рэстарана.
Архітэктура жылога корпуса заснавана на рытме гарызантальных міжпаверхавых керамзітабетонных панелей і вертыкальных навясных рэбраў. Сцены звонку аздоблены вертыкальнымі цягамі з алюмінію. Элемент асіметрыі ў кампазіцыю ўносіць самастойны вертыкальны аб’ём пажарнай лесвічнай клеткі, у завяршэнні якой светлавая рэклама.
Планіроўка калідорная з двухбаковым размяшчэннем пакояў. Перад ліфтавымі групамі і міжпаверхавай лесвіцай прасторныя холы. На 4-м і 2-м паверхах адміністрацыйныя і службовыя памяшканні, кіёскі. У афармленні інтэр’ераў выкарыстаны ракушачны туф, чорны лабрадарыт, шэры мармур, шпона, ціснёная скура.
Прамавугольны ў плане аб’ём рэстарана значна выступае перад галоўным фасадам гасцініцы і арганізаваны вакол унутранага дворыка. Фасады абліцаваны туфам. На галоўным фасадзе асіметрычна размешчана дэкаратыўнае пано (мастак Я. Кузняцоў, размалёўка па керамічнай плітцы). На 1-м паверсе знаходзіцца вестыбюль, гардэроб рэстарана, экспрэс-кафэ, на 2-м — абедзенная зала і бар. Паверхі звязаны вітой лесвіцай. Кесонная столь залы аздоблена сюжэтнай арнаментальнай фрэскавай размалёўкай (мастачка С. Каткова), сцены аформлены дэкаратыўнымі керамічнымі пано (мастакі М. Байрачны, В. Прыешкін і інш.). Дэкаратыўны акцэнт інтэр’ера — вялізная люстра (нёманскае шкло). Пры ўваходзе ў рэстаран керамічнае пано «Садоўніца».
2 снежня 2021 года гасцініца ўвайшла ў чорны спіс Еўрасаюза. 20 снежня «Планету» ў свой санкцыйны спіс уключыла ШвейцарыяSearching for subjects of sanctions. 22 снежня да адпаведнага пакета санкцый ЕС далучыліся Албанія, Ісландыя, Ліхтэнштэйн, Нарвегія, Паўночная Македонія, Сербія, Чарнагорыя.
Літаратура
Катэгорыя:Праспект Пераможцаў (Мінск) Катэгорыя:Будынкі і збудаванні Мінска Катэгорыя:Будынкі і збудаванні Георгія Бенядзіктава Катэгорыя:1980 год у Мінску Катэгорыя:Гасцініцы Мінска Катэгорыя:Праспект Машэрава (Мінск) Катэгорыя:Будынкі і збудаванні Тамары Раманоўскай Катэгорыя:Будынкі і збудаванні Уладзіміра Начарава Катэгорыя:Беларускія юрыдычныя асобы ў Чорным спісе ЕС