Тама́ш Дарашке́віч (; працаваў у другой палове XVIII — пачатку XIX стагоддзя) — мастак-манументаліст, майстар ілюзіяністычнага жывапісу, які працаваў на тэрыторыі Вялікага Княства Літоўскага (цяперашняй Беларусі).
Біяграфія і творчасць Дакладныя даты нараджэння і смерці мастака невядомыя. Тамаш Дарашкевіч актыўна працаваў у канцы XVIII — пачатку XIX стагоддзя. У архіўных дакументах ён згадваецца як майстар, які дасканала валодаў тэхнікай ілюзіяністычнага (аптычнага) жывапісу і ствараў ілюзорныя аптычныя алтары ў сакральных будынках Вялікага Княства Літоўскага.
Найбольш вядомай і падрабязна задакументаванай працай мастака з’яўляецца мастацкае афармленне драўлянага парафіяльнага касцёла Найсвяцейшай Тройцы ў мястэчку Амнішава, пабудаванага каля 1795 года. Гэты храм да нашага часу не захаваўся. У касцёльным інвентары 1804 года Дарашкевіч называецца «вопытным у мастацтве жывапісу майстрам» (). Паводле гэтага дакумента, мастак цалкам распісаў інтэр’ер храма: на столі былі створаны фрэскі са сцэнамі са Старога і Новага Запаветаў (у тым ліку шматфігурная кампазіцыя «Збор манны нябеснай»), а на сценах прэсбітэрыя мастак ілюзіяністычна напісаў каланаду і тры аптычныя алтары.
Гэтыя маляваныя архітэктурныя формы служылі апраўленнем для карцін, таксама напісаных Дарашкевічам алейнымі фарбамі на палатне. Сярод іх згадваюцца абразы «Найсвяцейшая Тройца», «Маці Божая Шкаплерная», «Святы Антоній», «Святы Юзаф» і «Святы Ісідор». Разам з фрэскамі гэтыя творы ўтваралі адзіны манументальны ансамбль, які дэманстраваў высокі ўзровень прафесіяналізму і ўменне аўтара працаваць з перспектывай.
Крыніцы
Літаратура
Катэгорыя:Мастакі Беларусі XVIII стагоддзя Катэгорыя:Мастакі-манументалісты Беларусі Катэгорыя:Мастакі барока Катэгорыя:Мастакі Беларусі XIX стагоддзя