Канстанцінс Пэкшэнс (, ) — латвійскі архітэктар. Унёс вялікі ўклад у архітэктурнае аблічча Рыгі і іншых гарадоў Латвіі канца XIX — пачатку XX стагоддзя.
Біяграфія Нарадзіўся ў заможнай сялянскай сям’і. Разам з бацькамі ў 1869 годзе пераехаў на сталае месца жыхарства ў Рыгу. Скончыў прыватную гімназію і Рыжскае політэхнічнае вучылішча (1885). Быў сябрам латышскай студэнцкай карпарацыі «Selonia». Другі, пасля Яніса Фрыдрыхса Баўманіса, латышскі архітэктар, які атрымаў вышэйшую прафесійную адукацыю.
Працаваў у архітэктурным бюро Яніса Баўманіса (1885), з 1886 займаўся самастойнай практыкай.
Асноўная стылістыка работ Канстанцінса Пэкшэнса — эклектыка і мадэрн, уключаючы такія яго формы, як нацыянальны рамантызм і, пазней, вертыкалізм. Вызначаўся наватарствам, быў адным з першых рыжскіх архітэктараў, якія будавалі дамы ў шэсць паверхаў.
У сярэдзіне 1890-х увёў у практыку гарадской забудовы Рыгі дамы з вуглавымі вежамі, чым аптымізаваў архітэктурна-мастацкае рашэнне прасторы скрыжаванняў. Выкарыстоўваў арнаментальны дэкор пад аконнымі праёмамі.
У сваёй позняй творчасці адышоў ад залішняй дэкаратыўнасці, надаваў большую ўвагу аб’ёмным элементам — эркерам, балконам, франтонам.
У праектным бюро Пэкшэна працавалі маладыя архітэктары, якія сталі ў далейшым прызнанымі майстрамі: Эйжэнс Лаўбэ, Аляксандрс Ванагс, Аўгустс Малвес, Артурс Мёдлінгерс, Эрнэстс Поле.
Займаўся грамадскай дзейнасцю. Быў заснавальнікам і ўладальнікам фірмы, якая займалася абсталяваннем сістэм цэнтральнага апалу.
Памёр у Германіі, у баварскім Бад-Кісінгене, куды выязджаў лячыцца. Пахаваны ў Рызе, на Лясных могілках. Крыніцы
Катэгорыя:Архітэктары Латвіі