Radomir Antić, nado en Žitište (Serbia, por entón pertencente á República Federal Socialista de Iugoslavia) o 22 de novembro de 1948 e finado en Madrid o 6 de abril de 2020, foi un exfutbolista e adestrador de fútbol serbio que xogou na demarcación de defensa.
Traxectoria Coma xogador Comezou xogando no FK Sloboda Užice, fichando pronto por un grande da liga iugoslava, o FK Partizan Belgrado, no que militou durante sete tempadas, durante as cales se proclamou campión de liga en 1976.
En 1977 fichou polo Fenerbahçe SK turco, co que tamén conquistou o título da liga. Un ano despois fichou polo Real Zaragoza, onde permaneceu dous anos. En 1980 trasladouse a xogar a Inglaterra, fichando polo Luton Town FC, onde se retirou coma futbolista profesional.
Coma adestrador Comezou a súa carreira coma adestrador no FK Partizan Belgrado, onde gañou dúas ligas nas súas dúas primeiras tempadas no club. En 1988 volveu ao Real Zaragoza; na súa primeira tempada no equipo aragonés rematou o campionato en quinta posición, clasificandoa para disputar a Copa da UEFA.
A metade da tempada 1990/91 fichou polo Real Madrid para substituír a Alfredo Di Stéfano; obtivo bos resultados e rematou o campionato en terceira posición. Porén, o ano seguinte foi destituído a causa do mal xogo a pesar de estar na primeira posición da liga.
Comezada a tempada 1992/93 substitúe a Javier Irureta no Real Oviedo, equipo onde permaneceu tres tempadas. En 1995 fichou polo Atlético de Madrid; no equipo madrileño tivo a súa mellor época, gañando a Liga e a Copa do Rei en 1996. En 1998 deixou o equipo, pero a finais da tempada 1999/00 volveu ser chamado para tentar salvalo do descenso a Segunda División, obxectivo que non acadou.
Ao ano seguinte sufriu outro descenso, esta vez no Real Oviedo.
En xaneiro de 2003 fichou polo FC Barcelona para substituír a Louis Van Gaal, colleu o equipo a tres puntos do descenso e rematou a tempada en postos de Copa UEFA e chegou a cuartos de final da Liga de Campións. A pesar deste bo rendemento e da boa opinión da xunta directiva, a vitoria de Joan Laporta nas eleccións a presidencia fan que non se renove o adestrador serbio e se fiche o holandés Frank Rijkaard.
A mediados da tempada 2003/04 fichou polo Celta de Vigo en substitución de Lotina para tentar salvar o equipo do descenso. Porén, o tecnico centrou a atención na Liga de Campións, na que o equipo galego seguía vivo, e renunciou ao seu cargo trala eliminación do mesmo ante o Arsenal Football Club e tras so dúas vitorias en campionato ligueiro. O equipo rematou descendendo a final de tempada.
Entre os anos 2008 e 2010 fíxose cargo da Selección de fútbol de Serbia e clasificouna como primeira de grupo para o Mundial de Fútbol de Suráfrica 2010, pero foi eliminada na fase de grupos e foi destituído en setembro dese ano.
O 26 de decembro de 2012 foi contratado polo Shandong Luneng, da Superliga chinesa. Deixou o equipo o ano seguinte e en 2015 fichou polo Hebei Zhongji, da segunda división chinesa.
Categoría:Nados no distrito do Banato Central Categoría:Nados en 1948 Categoría:Defensas de fútbol Categoría:Futbolistas de Iugoslavia Categoría:Futbolistas de Serbia Categoría:Xogadores do FK Sloboda Užice Categoría:Xogadores do FK Partizan Categoría:Xogadores do Fenerbahçe Categoría:Xogadores do Real Zaragoza Categoría:Xogadores do Luton Town FC Categoría:Xogadores da selección de fútbol de Iugoslavia Categoría:Adestradores de fútbol de Iugoslavia Categoría:Adestradores de fútbol de Serbia Categoría:Adestradores do FK Partizan Categoría:Adestradores do Real Zaragoza Categoría:Adestradores do Real Madrid CF Categoría:Adestradores do Atlético de Madrid Categoría:Adestradores do Real Oviedo Categoría:Adestradores do FC Barcelona Categoría:Adestradores do Celta de Vigo Categoría:Adestradores da selección de fútbol de Serbia Categoría:Adestradores do Shandong Luneng CF Categoría:Adestradores do Hebei China Fortune FC Categoría:Finados en 2020