Francisco José Prieto Fernández, nado en Ourense o 18 de agosto de 1968, é un sacerdote católico galego. No presente é arcebispo de Santiago de Compostela, o cargo máis alto dentro da xerarquía da Igrexa Católica en Galicia.
Traxectoria Francisco José Prieto estudou filosofía e teoloxía no seminario de Ourense e na Universidade de Navarra. Despois de proseguir os estudos na Pontificia Universidade Gregoriana, obtivo a licenciatura en patrística. O 26 de xuño de 1993 foi ordenado crego na catedral de Ourense.
Despois dunha breve actividade como capelán, de 1995 a 1996 foi educador do colexio masculino da diocese de Ourense, onde deu clase de patroloxía e orixes do cristianismo, de metodoloxía científica, de cristoloxía e de marioloxía, e mais profesor asociado da Universidade Pontificia de Salamanca. Despois, traballou en varias parroquias da provincia de Ourense como crego (Ourense cidade, Chaguazoso, Manzalvos, Cádavos, Castromil, até 1997), de Vilar de Astrés (até 2001), e do Reino, Torcela, A Corna e Coiras, ademais como párroco do mosteiro de San Xosé en Vilar de Astrés.
De 1998 a 2020 dirixiu o Centro de Estudos Teolóxicos a Distancia e de 2009 a 2012 a Escola Diocesana de Teoloxía. De 2007 a 2019 foi profesor do instituto teolóxico de Ourense. Desde 2012 foi o responsable de "nova evanxelización" co cargo de vigairo episcopal, até que foi nomeado bispo auxiliar de Santiago de Compostela e bispo titular da diocese de Vergi, o 28 de xaneiro de 2021. O papa que o nomeou bispo auxiliar foi Francisco. A consagración episcopal foi o 10 de abril de 2021 nunha cerimonia presidida polo monseñor Julián Barrio.
O 1 de abril de 2023, deuse a coñecer que o papa Francisco nomeara a Francisco Prieto como arcebispo de Santiago de Compostela. Con esta designación, o papa continuou coa tendencia de facer ao arcebispo polo bispo auxiliar da sé compostelá, algo que xa pasara cando Ángel Suquía foi substituído por Antonio María Rouco Varela, quen logo sería sucedido por Julián Barrio.
Foi ordenado arcebispo o 3 de xuño de 2023.
Heráldica miniatura|esquerda|Escudo arcebispal de Francisco José Prieto. O seu escudo episcopal é terzado en perla. Na parte superior, de azur, un libro coas letras gregas alfa e omega representa a Palabra de Deus e baixo este o anagrama mariano do A cun M, que significa Ave María. Na parte inferior esquerda, sobre fondo de prata, repréntase a Martiño de Tours partindo a súa capa, unha referencia á diocese de orixe de Francisco José Prieto. Na parte inferior dereita, en prata unha urna do sepulcro do Apóstolo Santiago, surmontada dunha estrela de oito puntas sobre un fondo de goles.
O escudo inclúe o lema "Sequi Salvatorem participare est salutem" (en galego: seguir o Salvador é participar na salvación), unha frase tirada da obra Contra as herexías de Ireneu de Lión, Pai da Igrexa.
Notas
Véxase tamén
Ligazóns externas
Páxina web da Arquidiócese de Santiago de Compostela Libreto da celebración da ordenación episcopal de Francisco José Prieto como bispo auxiliar de Santiago de Compostela
Categoría:Bispos católicos de Galicia Categoría:Alumnos da Pontificia Universidade Gregoriana Categoría:Alumnos da Universidade de Navarra Categoría:Nados en Ourense Categoría:Nados en 1968 Categoría:Arcebispos e bispos de Compostela - Iria