Anuna De Wever, nada en Mortsel o 16 de xuño de 2001, é unha estudante e activista polo clima belga. É unha das principais figuras do movemento de mocidade polo clima en Bélxica.
Traxectoria Xunto a Kyra Gantois e Adélaïde Charlier, De Wever converteuse nunha das principais figuras do movemento da mocidade polo clima en Bélxica. Como resultado, entre os meses de febreiro e maio de 2019, escribiu unha columna semanal na revista HUMO.
En outubro de 2019, De Wever foi unha das activistas climáticas máis novas en viaxar no transatlántico baixo en carbono Regina Maris con rumbo á Conferencia das Nacións Unidas sobre o Cambio Climático de 2019 en Santiago, Chile, aínda que posteriormente desenvolveuse en Madrid, España.
Despois das folgas escolares en Bélxica, o ministro flamengo de Medio Ambiente de centro dereita, Joke Schauvliege, viuse obrigado a dimitir, tras afirmar que o Servizo de Seguridade do Estado tiña información de que detrás da folga climática había unha organización política.
As diferenzas persoais no seo do movemento da mocidade polo clima en Bélxica provocaron a marcha da cofundadora Kyra Gantois en agosto de 2019.
A notoriedade que adquiriu De Wever a través das folgas escolares levárona a ser o branco da extrema dereita con episodios como o lanzamento de botellas con ouriños durante o festival de música Pukkelpop, no que ademais se asaltaron varias tendas de campaña durante a noite para tentar localizala. A política do mozos implicados estaba simbolizada polo uso dunha variante da bandeira de Flandres que exclúe todos os elementos vermellos.
Recoñecementos En maio de 2019, De Wever e Kyra Gantois recibiron conxuntamente o Premio Ark da Palabra Libre. Uns meses despois, en setembro do mesmo ano, De Wever e Adélaïde Charlier recibiron o Premio Embaixador de Conciencia de Amnistía Internacional en Bélxica en nome do movemento da mocidade polo clima.
Notas
Categoría:Nados en 2001 Categoría:Nados na provincia de Anveres Categoría:Activistas de Bélxica Categoría:Persoas non binarias