Шумски здравец () — вид на издржливо цветно растение од семејството Geraniaceae, домороден во Европа и Северна Турција.

Латинската определба на видот, неговиот специфичен епитет, sylvaticum значи „од шума“, што се однесува на домородното живеалиште на растението.

Опис Шумскиот здравец е повеќегодишно тревесто растение, високо до 60 см, со косо поставен дебел ризом препокриен со остатоци од кафеави прилисници. Стеблото му е вертикално, цевчесто, во основата широко 3 до 5 мм, аглесто, со расперени или со лачно искривени и свртени надолу влакна, кои се особено густи во горниот дел, со 2–3 листа и со неколку листа во основата. Листовите од двете страни се со прилегнати влакна. Базалните листови имаат многу долги дршки, 2–2,5 пати подолги од широчината на лиската. Листовите се широки 5 до 12 см, обично до 3/4 пересто насечени на 5–7 дела, кои се обратно-јајцевидни, секој дел е назабен, а терминалниот дел е насечен на 3 мали сегменти кои се назабени. Назабените делови се подолго или покусо заострени, лисните дршки имаат лачно искривени и свртени надолу влакна. Стеблените листови имаат многу покуси дршки, спирално распоредени, а најгорните наспромни, а исто така и сите други во соцветието. Листовите исто така се пересто насечени 2/3–3/4 на обратно-копјести или копјести делови кои се длабоко назабени или пересто насечени, а перестите делови назабени со прилегнати влакна. Листовите во областа на соцветието на долната страна и по работ покрај прилегнатите влакна имаат и густи жлездести влакна. Прилисниците на базалните листови се копјести, долги 1,5 до 2 см, светликави, со ситни прилегнати влакненца во долната половина, со долг заострен врв. Кај стеблените листови прилисниците се значително помали. Цветовите се групирани во еден повеќецветен дихазиум. Дршките на цветовите и на соцветие се со густи прости, а особено со густи расперени жлездести влакна. Цветовите обично одат по 2, а пупките се свртени надолу. Дршките на цветовите се долги околу 1–2 см, а во основата со 4 влакнести по работ прицветници. Чашката е зелена, а чашкините ливчиња се долги 9 до 12 мм, јајцевидно-копјести, со 3 до 5 жили, по површината со прилегнати влакна, а по жилите со густи жлездести влакна, со ципест раб. Ливчињата на врвот се со еден влакнест осилест дел долг 1 до 3 мм. Венчето е големо, бојата на венчето е црвено-виолетова до розова, синкава и бела. Венечните ливчиња се обратно-јајцевидни, долги 6 до 20 мм, во основата клиновидни и со влакна по работ. Прашниците се долги колку чашката. Филаментите кон основата постепено проширени и со густи куси влакненца и со ретки долги жлездести влакна. Плодните делови се мазни, со прилегнати влакна. Семките се кафеави и со ситна мрежеста структура по површината.

Живеалиште По каменливи и влажни станишта, по грмушести места во букови шуми и покрај планински потоци, на надморски височини до 2.100 м.

Распространетост Евроазија: 2001. TDWG – World Geographical Scheme for Recording Plant Distributions, 2nd Edition

Албанија, Алтај, Австрија, Балтички држави, Белорусија, Белгија, Бугарија, Средноевропска Русија, Корзика, Чехословачка, Данска, Источноевропска Русија, Финска, Франција, Феројар, Германија, Велика Британија, Грција, Унгарија, Исланд, Иран, Ирска, Иркутск, Италија, Казахстан, Краснојарск, Северен Кавказ, Северноевропска Русија, Северозападна Европска Русија, Норвешка, Полска, Романија, Јужноевропска Русија, Шпанија, Шведска, Швајцарија, Закавказ, Турција, Украина, Западен Сибир, Југославија.

Во Македонија Познат за планините Јакупица, Шар Планина, Рудока, Кораб, Бистра, Дешат, Јабланица, Баба со Пелистер, Ниџе со Кајмакчалан. Потоа во околината на Мавровското Езеро и клисурата на Мавровска Река.

Одгледување десно|мини|Подробности од цвет Шумскиот здравец е еден од многуте видови здравци кои се ценети во градините. Погоден е за одгледување во умерени климатски услови на сигурно влажни, лесно засенчени места, како што навестува и самото име. Особено е корисен за потсадување листопадни дрвја, рози, лилјани и други растенија што цветаат во лето. Избрани се различни сорти, од кои „Album“ и „Mayflower“ ја добиле наградата за градинарски заслуги на Кралското хортикултурно друштво.

Употреба и традиции Шумскиот здравец е цвет на градот Шефилд во Обединетото Кралство.Plantlife website County Flowers page

Цветовите даваат сино-сива боја што се користела во античка Европа за боење на воените наметки, верувајќи дека ќе ги заштити во битка. Поради оваа причина била наречена Одинова милост.

Наводи

Надворешни врски

Категорија:Растителни таксони опишани од Карл Линеј Категорија:Растенија опишани во 1753 година Категорија:Флора на Обединетото Кралство Категорија:Флора на Естонија Категорија:Флора на Европа Категорија:Здравец Категорија:Флора на Македонија