Господарот на прстените: Прстените на моќта

Господарот на прстените: Прстените на моќта () — американска фантастична телевизиска серија, заснована на романот Господарот на прстените од Џ. Р. Р. Толкин и додатоците кон него, создадена од Џ. Д. Пејн и Патрик Макеј за преносната услуга Amazon Prime Video. Дејството на серијата се случува во втората доба од легендариумот на Толкин и ги опфаќа главните настани од овој период: ковањето на прстените на моќта, подемот на Саурон, епската историја на Нуменор и Последниот сојуз на вилениците и луѓето. Со производството на серијата раководи компанијата Amazon Studios во соработка со New Line Cinema, Tolkien Estate, The Tolkien Trust и HarperCollins.

Во ноември 2017 г., компанијата Amazon ги откупила правата за адаптација на Господарот на прстените во вид серија за 250 милиони долари, преземајќи обврска за производство на пет сезони со буџет од најмалку 1 милијарда долари. Ова го направило проектот најскап во историјата. Џ. Д. Пејн и Патрик Макеј ги добиле улогите на раководители во јули 2018 г. Серијата главно се заснова врз додатоците кон Господарот на прстените, кои содржат описи на настаните од Второто доба, и во согласност со барањата на претставниците на Tolkien Estate, проектот не претставува продолжение на филмските трилогии Господарот на прстените и Хобит.

Главната музичка тема на серијата ја создал Хауард Шор, кој ја напишал музиката и за филмските трилогии Господарот на прстените и Хобит, додека останатото музичко оформување го потпишува Беар Макрири. Глумечката екипа на првата сезона излегла мошне бројна и мултинационална; самото снимање се одвивало од февруари 2020 до август 2021 г. во Нов Зеланд, каде што се снимале и филмовите на Питер Џексон. Снимањето било привремено прекинато на неколку месеци поради Пандемијата на КОВИД-19. Процесот на снимање на следните сезони се префрлил во Обединетото Кралство. Снимањето на втората сезона траело од октомври 2022 до јуни 2023 г., завршувајќи за време на штрајкот на сценаристите во САД. Третата сезона се снимала од мај до декември 2025 г., додека почетокот на снимањето на четвртата сезона е најавен за почетокот на 2027 г.

Премиерата на првите две епизоди од првата сезона се одржала на Prime Video на 2 септември 2022 г., поставувајќи рекордна гледаност во историјата на оваа услуга. Сезоната добила главно потврдни одзиви од критичарите, кои ги пофалиле камерата, визуелните ефекти и музичката придружба, но изразиле забелешки во поглед на темпото на раскажување и развојот на ликовите. Серијата освоила низа награди и номинации, меѓу кои и награда од БАФТА и 7 номинации за наградата „Еми“. Премиерата на втората сезона се одржала на 29 август 2024 г., додека излегувањето на третата сезона е закажано за 11 ноември 2026 г.

Содржина Дејството на телевизиската серија се одвива илјадници години пред настаните опишани во Хобит и Господарот на прстените. Приказната се заснова врз историјата на Средната Земја опишана во делата на Џ. Р. Р. Толкин. Серијата започнува во време на релативен мир и ги опфаќа сите клучни настани од втората доба на Средната Земја: ковањето на прстените на моќта, подемот на Темниот Господар Саурон, падот на островското кралство Нуменор и Последниот сојуз на вилениците и луѓето. Овие настани во делата на Толкин се одвиваат во текот на повеќе од три илјади години, но сценаристите на серијата значително ја стесниле изворната хронологија.

Улоги

Наводи

Надворешни врски

Категорија:Телевизиски серии на англиски јазик Категорија:Господар на прстените Категорија:Телевизиски серии на Amazon Studios Категорија:Оригинални програми на Amazon Prime Video Категорија:Американски телевизиски серии Категорија:Американски акциони телевизиски серии Категорија:Американски авантуристички телевизиски серии

Господарот на прстените: Прстените на моќта

Źródło i licencja