Першая Біблія Карла Лысага (), таксама Вівіянская Біблія () — ілюмінаваны рукапіс Бібліі, помнік кніжнага мастацтва Каралінгскага Адраджэння. Захоўваецца ў Нацыянальнай бібліятэцы Францыі (каталожнае абазначэнне MS lat. 1). У надпісы на карэньчыку пазначаны як — «Мецская Біблія».
Кодэкс быў створаны ў 845 годзе ў скрыпторыі абацтва Святога Марціна ў Туры па замове графа Вівіана. Біблія была паднесена каралю Карлу II Лысаму падчас яго візіту ў абацтва на Каляды 845 года. Дадзенаму сюжэту прысвечана поўнастаронкавая мініяцюра. Гэта адна з трох раскошных Біблій, створаных для караля.
Рукапіс уключае 423 ліста пергамента фарматам 495 × 345 мм, поўны тэкст Вульгаты, 4 табліцы канонаў, 8 поўнастаронкавых мініяцюр, 87 поўнастаронкавых ініцыялаў. У прысвячэнні праводзіцца думка пра важнасць чытання і разумення Бібліі для добрага кіраўніка. Пасланні Гераніма і прысвячэнні выкананы залатымі літарамі унцыялам па пурпурным пергаменце, іншы тэкст перапісаны ў дзве калонкі каралінгскім мінускулам.
Як мяркуецца, пасля 870 года рукапіс знаходзіўся ў рызніцы Мецскага сабора. У 1675 годзе манускрыпт апынуўся ў бібліятэцы Кальбера, а пасля яго скону ў 1683 годзе перайшоў у каралеўскую бібліятэку.
Літаратура , Joachim E. Gaehde: Karolingische Buchmalerei. Prestel, München 1979, S. 75-81, ISBN 3-7913-0395-3 Ingo F. Walther, Norbert Wolf: Meisterwerke der Buchmalerei. Taschen, Köln u. a. 2005, С. 96-97, ISBN 3-8228-4747-X
Спасылкі Аблічбаваны рукапіс у Нацыянальнай бібліятэцы Францыі
Катэгорыя:Ілюмінаваныя рукапісы паводле алфавіта Катэгорыя:Біблейскія рукапісы Катэгорыя:Карл Лысы Катэгорыя:Каралінгскія ілюмінаваныя рукапісы Катэгорыя:Нацыянальная бібліятэка Францыі