Дом, дзе жыў Змітрок Бядуля — будынак у Мінску, размешчаны на адрасе Рабкараўская вуліца, 19.
Гісторыя Пабудаваны ў пачатку XX стагоддзя, на металічнай дэкаратыўнай рашотцы над ганкам значыцца дата: 1904 г. Размяшчаўся на былой Мала-Георгіеўскай вуліцы (дом № 12) прадмесця Уборкі. У Першую сусветную вайну будынак выкарыстоўваўся (1915 г.) як сталоўка для бежанцаў.
У 1916—19 гг. у кватэры правай палавіны дома жыў беларускі пісьменнік Змітрок Бядуля. У верасні 1916 г. тут спыніўся і жыў да ад’езду ў Ялту ў лютым 1917 г. Максім Багдановіч. У 1919 г. у доме пэўны час жыла пісьменніца Зоська Верас. Неаднаразова бываў тут і А. Р. Чарвякоў. Аднак будынак больш вядомы як дом, дзе жыў Змітрок Бядуля. У 1957 г. на ўшанаванне яго памяці на доме ўстаноўлена мемарыяльная дошка.
Да 1985 г. знаходзіўся на вуліцы Талстога (дом 14а). Пасля перанесены па вуліцу Рабкораўскую (дом 3, цяпер 19), у 1987 г. рэстаўрыраваны. Цяпер тут філіял музея М. Багдановіча Беларуская хатка.
Архітэктура
Будынак з абчасаных на два канты брусоў, складзеных у чысты вугал (без астатку), на цагляным падмурку. Накрыты двухсхільным дахам. 3 боку вуліцы — два ганкі з двухсхільнымі навісамі на металічных кансолях. 3 боку двара — больш позняя зрубная прыбудова. Нягледзячы на пазнейшыя змены, дом захаваў асноўныя планіровачныя рысы, характэрныя драўляным жылым пабудовам горада пачатку стагоддзя. Будынак падзелены па 2 палавіны: у правай размешчана адна кватэра, у левай — дзве. Кожная палавіна мае ўваходы як з боку вуліцы, так і з гаспадарчага двара. У архітэктуры пабудовы выкарыстаны разны дэкор на карнізах страхі і шчытах-франтонах. Зашаляваныя вуглы ўпрыгожаны ў верхняй частцы геаметрычнай фігурай ромба. Вокны бакавых і дваровага фасадаў аздоблены філёнгавымі аканіцамі. Металічныя петлі ад аканіц захаваліся і на ліштвах вокнаў вулічнага фасаду. Унутры частка сцен была атынкавана і пабелена, частка абклеена шпалерамі.
Літаратура
Спасылкі
Катэгорыя:Рабкараўская вуліца (Мінск) Катэгорыя:Будынкі і збудаванні Мінска Катэгорыя:1904 год у Мінску Катэгорыя:Драўляная архітэктура Беларусі Катэгорыя:Перамешчаныя будынкі і збудаванні Беларусі Катэгорыя:Змітрок Бядуля Катэгорыя:Максім Багдановіч